umur-e-KHair mein kuchh ehtimam ho na saka

umūr-e-ḳhair meñ kuchh ehtimām ho na sakā

maal nek ho jis kā vo kaam ho na sakā

baġhair manzil-e-avval qayām ho na sakā

jab aayā coach kā din phir maqām ho na sakā

har ek murtakib ma.asiyat yahāñ se gayā

kisī bashar se farishte kā kaam ho na sakā

qadam kisī kī na Thahrī jab āb-o-dāna uThā

guhar se batn-e-sadaf meñ qayām ho na sakā

sharāb-e-āb-e-ḳhajālat nigāh meñ Thahre

ki chashm-e-yār se ham-chashm jaam ho na sakā

nazākat us ke qadam chūmtī hai dekhā hai

kaḌī pahan liye jis din ḳhirām ho na sakā

mile na un se mile ham judā hue jab se

phaTā dil aisā ki phir iltiyām ho na sakā

har ek rañj ko rāhat samajh lī shukr kiyā

kare shikāyat-e-āqā ġhulām ho na sakā

kisī ke mulk-e-itā.at meñ aamlī na chale

fasād-e-nafs rahā intizām ho na sakā

huā hai ātish-e-gul meñ lagī ye talvoñ se

uḌe sharar kī tarah ham qayām ho na sakā

ga.e jo shikve ko apnā sā muñh vo le ke phire

milī zabān na muñh meñ kalām ho na sakā

sharāb tark kī ham ne raqīb ke hāthoñ

lahū ke ghūñT piyeñ ham mudām ho na sakā

kabhī vafā.ī na hilne diyā lab-e-fariyād

butoñ se hashr meñ bhī intiqām ho na sakā

hazār ne.mat-e-duniyā ne ham ko lalchāyā

halāl luqma hamārā harām ho na sakā

nasīb ho na taraqqī to baaḌh hai be-kār

hilāl teġh kā māh-e-tamām ho na sakā

hai yādgār zamāne meñ apnī tanhā.ī

faqīr kā koī qaa.im maqām ho na sakā

hazār mauj-sifat 'bahr' dast-o-pā maare

habāb saañ magar apnā qayām ho na sakā

umur-e-KHair mein kuchh ehtimam ho na saka

mal nek ho jis ka wo kaam ho na saka

baghair manzil-e-awwal qayam ho na saka

jab aaya coach ka din phir maqam ho na saka

har ek murtakib masiyat yahan se gaya

kisi bashar se farishte ka kaam ho na saka

qadam kisi ki na Thahri jab aab-o-dana uTha

guhar se batn-e-sadaf mein qayam ho na saka

sharab-e-ab-e-KHajalat nigah mein Thahre

ki chashm-e-yar se ham-chashm jam ho na saka

nazakat us ke qadam chumti hai dekha hai

kaDi pahan liye jis din KHiram ho na saka

mile na un se mile hum juda hue jab se

phaTa dil aisa ki phir iltiyam ho na saka

har ek ranj ko rahat samajh li shukr kiya

kare shikayat-e-aqa ghulam ho na saka

kisi ke mulk-e-itaat mein aamli na chale

fasad-e-nafs raha intizam ho na saka

hua hai aatish-e-gul mein lagi ye talwon se

uDe sharar ki tarah hum qayam ho na saka

gae jo shikwe ko apna sa munh wo le ke phire

mili zaban na munh mein kalam ho na saka

sharab tark ki hum ne raqib ke hathon

lahu ke ghunT piyen hum mudam ho na saka

kabhi wafai na hilne diya lab-e-fariyaad

buton se hashr mein bhi intiqam ho na saka

hazar nemat-e-duniya ne hum ko lalchaya

halal luqma hamara haram ho na saka

nasib ho na taraqqi to baDh hai be-kar

hilal tegh ka mah-e-tamam ho na saka

hai yaadgar zamane mein apni tanhai

faqir ka koi qaim maqam ho na saka

hazar mauj-sifat 'bahr' dast-o-pa mare

habab san magar apna qayam ho na saka