un ka diwana sada un pe nazar rakhta hai

un kā dīvāna sadā un pe nazar rakhtā hai

ḳhud se begāna sahī un kī ḳhabar rakhtā hai

chehra chehra mutabassim hai tirī mahfil meñ

phir bhī ik chehra abhī dīda-e-tar rakhtā hai

ab to insāñ se ġhanīmat hai ik adnā panchhī

laakh kamzor sahī apnā to ghar rakhtā hai

jis kī sāñsoñ meñ basī ho tirī yādoñ kī mahak

ġhuncha-o-gul pe vo kab apnī nazar rakhtā hai

tere aane se yaqīñ mujh ko huā hai ai dost

jazba-e-shauq-e-mulāqāt asar rakhtā hai

jis ko jiine kā salīqa nahīñ aatā 'mashkūr'

apne dāman meñ vahī la.al-o-gohar rakhtā hai

un ka diwana sada un pe nazar rakhta hai

KHud se begana sahi un ki KHabar rakhta hai

chehra chehra mutabassim hai teri mahfil mein

phir bhi ek chehra abhi dida-e-tar rakhta hai

ab to insan se ghanimat hai ek adna panchhi

lakh kamzor sahi apna to ghar rakhta hai

jis ki sanson mein basi ho teri yaadon ki mahak

ghuncha-o-gul pe wo kab apni nazar rakhta hai

tere aane se yaqin mujh ko hua hai ai dost

jazba-e-shauq-e-mulaqat asar rakhta hai

jis ko jine ka saliqa nahin aata 'mashkur'

apne daman mein wahi lal-o-gohar rakhta hai