un ka gham bhi na raha pas to phir kya hoga

un kā ġham bhī na rahā paas to phir kyā hogā

luT ga.ī daulat-e-ehsās to phir kyā hogā

kaun tā-sub.h jalā.egā tamannā ke charāġh

shaam se TuuT ga.ī aas to phir kyā hogā

jin kī duurī meñ vo lazzat hai ki betāb hai dil

aa ga.e vo jo kahīñ paas to phir kyā hogā

tum se zinda hai tamannā-e-mazāq-e-ehsās

tum hue dushman-e-ehsās to phir kyā hogā

dil ġham-e-dost pe maġhrūr bahut hai lekin

ġham bhī aayā na agar raas to phir kyā hogā

apnī maḳhmūr nigāhoñ ko na do izn-e-ḳhirām

baḌh ga.ī aur agar pyaas to phir kyā hogā

ham pareshāñ the pareshāñ haiñ pareshāñ hoñge

tum ko aa.ī na ḳhushī raas to phir kyā hogā

azmat-e-ishq hai ḳhuddārī-e-dil tak 'shā.er'

bujh gayā sho.ala-e-ehsās to phir kyā hogā

un ka gham bhi na raha pas to phir kya hoga

luT gai daulat-e-ehsas to phir kya hoga

kaun ta-subh jalaega tamanna ke charagh

sham se TuT gai aas to phir kya hoga

jin ki duri mein wo lazzat hai ki betab hai dil

aa gae wo jo kahin pas to phir kya hoga

tum se zinda hai tamanna-e-mazaq-e-ehsas

tum hue dushman-e-ehsas to phir kya hoga

dil gham-e-dost pe maghrur bahut hai lekin

gham bhi aaya na agar ras to phir kya hoga

apni maKHmur nigahon ko na do izn-e-KHiram

baDh gai aur agar pyas to phir kya hoga

hum pareshan the pareshan hain pareshan honge

tum ko aai na KHushi ras to phir kya hoga

azmat-e-ishq hai KHuddari-e-dil tak 'shaer'

bujh gaya shoala-e-ehsas to phir kya hoga