un ke aate hi main ho jata hun be-KHud itna

un ke aate hī maiñ ho jaatā huuñ be-ḳhud itnā

vo chale jaate haiñ pahlū se to hosh aatā hai

ishq hai ishq koī khel tamāshā to nahīñ

jiite jī dil se ḳhayāl un kā kahāñ jaatā hai

dar-o-dīvār ye kahte hue aate haiñ nazar

vo abhī aa.egā dekho vo chalā aatā hai

lāla-o-gul haiñ chaman meñ ki khile jaate haiñ

ġhuncha-e-dil hai mirā ek ki murjhātā hai

hai shab-e-māh meñ kyoñ vajd kā aalam mujh par

kaun ye sāz-e-rag-e-jāñ pe ġhazal gaatā hai

kuchh ajab rang se dekhā hai kisī ne 'sā.ib'

rang ik chehre pe aaj aatā hai ik jaatā hai

un ke aate hi main ho jata hun be-KHud itna

wo chale jate hain pahlu se to hosh aata hai

ishq hai ishq koi khel tamasha to nahin

jite ji dil se KHayal un ka kahan jata hai

dar-o-diwar ye kahte hue aate hain nazar

wo abhi aaega dekho wo chala aata hai

lala-o-gul hain chaman mein ki khile jate hain

ghuncha-e-dil hai mera ek ki murjhata hai

hai shab-e-mah mein kyon wajd ka aalam mujh par

kaun ye saz-e-rag-e-jaan pe ghazal gata hai

kuchh ajab rang se dekha hai kisi ne 'saib'

rang ek chehre pe aaj aata hai ek jata hai