un ke ek jaan-nisar hum bhi hain

un ke ik jāñ-nisār ham bhī haiñ

haiñ jahāñ sau hazār ham bhī haiñ

tum bhī bechain ham bhī haiñ bechain

tum bhī ho be-qarār ham bhī haiñ

ai falak kah to kyā irāda hai

aish ke ḳhvāst-gār ham bhī haiñ

khīñch lā.egā jazb-e-dil un ko

hama tan intizār ham bhī haiñ

bazm-e-dushman meñ le chalā hai dil

kaise be-iḳhtiyār ham bhī haiñ

shahr ḳhālī kiye dukāñ kaisī

ek hī bāda-ḳhvār ham bhī haiñ

sharm samjhe tire taġhāful ko

vaah kyā hoshiyār ham bhī haiñ

haath ham se milāo ai muusā

āshiq-e-rū-e-yār ham bhī haiñ

ḳhvāhish-e-bāda-e-tuhūr nahīñ

kaise parhez-gār ham bhī haiñ

tum agar apnī guuñ ke ho ma.ashūq

apne matlab ke yaar ham bhī haiñ

jis ne chāhā phañsā liyā ham ko

dilbaroñ ke shikār ham bhī haiñ

aa.ī mai-ḳhāne se ye kis kī sadā

laao yāroñ ke yaar ham bhī haiñ

le hī to legī dil nigāh tirī

har tarah hoshiyār ham bhī haiñ

idhar aa kar bhī fātiha paḌh lo

aaj zer-e-mazār ham bhī haiñ

ġhair kā haal pūchhiye ham se

us ke jalse ke yaar ham bhī haiñ

kaun sā dil hai jis meñ 'dāġh' nahīñ

ishq meñ yādgār ham bhī haiñ

un ke ek jaan-nisar hum bhi hain

hain jahan sau hazar hum bhi hain

tum bhi bechain hum bhi hain bechain

tum bhi ho be-qarar hum bhi hain

ai falak kah to kya irada hai

aish ke KHwast-gar hum bhi hain

khinch laega jazb-e-dil un ko

hama tan intizar hum bhi hain

bazm-e-dushman mein le chala hai dil

kaise be-iKHtiyar hum bhi hain

shahr KHali kiye dukan kaisi

ek hi baada-KHwar hum bhi hain

sharm samjhe tere taghaful ko

wah kya hoshiyar hum bhi hain

hath hum se milao ai musa

aashiq-e-ru-e-yar hum bhi hain

KHwahish-e-baada-e-tuhur nahin

kaise parhez-gar hum bhi hain

tum agar apni gun ke ho mashuq

apne matlab ke yar hum bhi hain

jis ne chaha phansa liya hum ko

dilbaron ke shikar hum bhi hain

aai mai-KHane se ye kis ki sada

lao yaron ke yar hum bhi hain

le hi to legi dil nigah teri

har tarah hoshiyar hum bhi hain

idhar aa kar bhi fatiha paDh lo

aaj zer-e-mazar hum bhi hain

ghair ka haal puchhiye hum se

us ke jalse ke yar hum bhi hain

kaun sa dil hai jis mein 'dagh' nahin

ishq mein yaadgar hum bhi hain