unki aankhon se mai-kashi ki hai

un kī āñkhoñ se mai-kashī kī hai

hālat ab apnī be-ḳhudī kī hai

apnī qismat meñ ranj-e-hijr kahāñ

ham ne insāñ se 'āshiqī kī hai

sub.h hañste haiñ raat rote haiñ

ham ne yuuñ apnī zindagī kī hai

āshiyāñ bijliyoñ kī zad meñ hai

kis ne gulshan kī muḳhbirī kī hai

kyā Darā.egā āsmāñ ham ko

bahr-e-ġham meñ shanāvarī kī hai

kyā shikāyat kareñ kisī se ham

ham se duniyā ne be-ruḳhī kī hai

chupke chupke se dil churā lenā

ye adā ḳhaas dilbarī kī hai

ham ko āsāñ nahīñ bhulā denā

ḳhvāb dekhe haiñ shā'irī kī hai

zulm zinda hai 'adl sharminda

tum ne kaisī ye munsifī kī hai

tum faqīroñ kā haal kyā jaano

tum ne to sirf sāhabī kī hai

ab añdheroñ kā ḳhauf kyā 'rāhī'

dil jalāyā hai raushnī kī hai

un ki aankhon se mai-kashi ki hai

haalat ab apni be-KHudi ki hai

apni qismat mein ranj-e-hijr kahan

hum ne insan se 'ashiqi ki hai

subh hanste hain raat rote hain

hum ne yun apni zindagi ki hai

aashiyan bijliyon ki zad mein hai

kis ne gulshan ki muKHbiri ki hai

kya Daraega aasman hum ko

bahr-e-gham mein shanawari ki hai

kya shikayat karen kisi se hum

hum se duniya ne be-ruKHi ki hai

chupke chupke se dil chura lena

ye ada KHas dilbari ki hai

hum ko aasan nahin bhula dena

KHwab dekhe hain sha'iri ki hai

zulm zinda hai 'adl sharminda

tum ne kaisi ye munsifi ki hai

tum faqiron ka haal kya jaano

tum ne to sirf sahabi ki hai

ab andheron ka KHauf kya 'rahi'

dil jalaya hai raushni ki hai