un ko jo shughl-e-naz se fursat na ho saki

un ko jo shuġhl-e-nāz se fursat na ho sakī

ham ne ye kah diyā ki mohabbat na ho sakī

shukr-e-jafā bhī ahl-e-razā ne kiyā adā

un se yahī nahīñ ki shikāyat na ho sakī

shab kā ye haal hai ki tirī yaad ke sivā

dil ko kisī ḳhayāl se rāhat na ho sakī

pā-bos kī bhī ham ko ijāzat na de sake

itnī bhī tum se qadr-e-mohabbat na ho sakī

ġharq-e-surūr-o-sūr mujhe pā ke daf.atan

nāseh se tark-e-mai kī nasīhat na ho sakī

ḳhāmoshiyoñ kā rāz-e-mohabbat vo pā ga.e

go ham se arz-e-hāl kī jur.at na ho sakī

kar dī zabān-e-shauq ne sab sharh-e-ārzū

alfāz meñ agarche sarāhat na ho sakī

lutf-e-mazīd kī maiñ tamannā to kar sakā

tum ye to kah sake ki qanā.at na ho sakī

kyuuñ itnī jald ho ga.e ghabrā ke ham fanā

ai dard-e-yār kuchh tirī ḳhidmat na ho sakī

vaa.iz ko apne aib-e-riyā kā rahā ḳhayāl

rindoñ kī saaf saaf mazammat na ho sakī

arbāb-e-qāl haal pe ġhālib na aa sake

zāhid se āshiqoñ kī imāmat na ho sakī

aisā bhī kyā itaab ki saaqī bachī-kuchhī

āḳhir meñ kuchh bhī ham ko ināyat na ho sakī

un se maiñ apne dil kā taqāzā na kar sakā

ye baat thī ḳhilāf-e-muravvat na ho sakī

kyuuñ aa.e hosh meñ jo ibādat na kar sake

pīr-e-muġhāñ kī ham se itā.at na ho sakī

'hasrat' tirī nigāh-e-mohabbat ko kyā kahūñ

mahfil meñ raat un se sharārat na ho sakī

un ko jo shughl-e-naz se fursat na ho saki

hum ne ye kah diya ki mohabbat na ho saki

shukr-e-jafa bhi ahl-e-raza ne kiya ada

un se yahi nahin ki shikayat na ho saki

shab ka ye haal hai ki teri yaad ke siwa

dil ko kisi KHayal se rahat na ho saki

pa-bos ki bhi hum ko ijazat na de sake

itni bhi tum se qadr-e-mohabbat na ho saki

gharq-e-surur-o-sur mujhe pa ke dafatan

naseh se tark-e-mai ki nasihat na ho saki

KHamoshiyon ka raaz-e-mohabbat wo pa gae

go hum se arz-e-haal ki jurat na ho saki

kar di zaban-e-shauq ne sab sharh-e-arzu

alfaz mein agarche sarahat na ho saki

lutf-e-mazid ki main tamanna to kar saka

tum ye to kah sake ki qanaat na ho saki

kyun itni jald ho gae ghabra ke hum fana

ai dard-e-yar kuchh teri KHidmat na ho saki

waiz ko apne aib-e-riya ka raha KHayal

rindon ki saf saf mazammat na ho saki

arbab-e-qal haal pe ghaalib na aa sake

zahid se aashiqon ki imamat na ho saki

aisa bhi kya itab ki saqi bachi-kuchhi

aaKHir mein kuchh bhi hum ko inayat na ho saki

un se main apne dil ka taqaza na kar saka

ye baat thi KHilaf-e-murawwat na ho saki

kyun aae hosh mein jo ibaadat na kar sake

pir-e-mughan ki hum se itaat na ho saki

'hasrat' teri nigah-e-mohabbat ko kya kahun

mahfil mein raat un se shararat na ho saki