un ko roz ek taza hila ek KHanjar chahiye

un ko roz ik taaza hiila ek ḳhanjar chāhiye

ham ko roz ik jaañ na.ī aur ik nayā sar chāhiye

iltifāt o sargirānī par ḳhushī kyā ranj kyā

kuchh bahāna is se baḌh kar dīda-e-tar chāhiye

kyā dikhā.eñ ḳhushk lab do buuñd ke saaqī haiñ sab

pyaas sahrā-e-azal us ko samundar chāhiye

sach kī ik nannhī sī koñpal ko kuchalne ke liye

jhuuT aur dushnām ke lashkar ke lashkar chāhiye

sabr kā dāmān-e-daulat hai amīroñ kā amiir

jabr kī daryūzgī ko saiñkaḌoñ dar chāhiye

but banāne pūjne phir toḌne ke vāste

ḳhud-parastī ko nayā har roz patthar chāhiye

ham ne jis duniyā ko Thukrāyā thā un ke vāste

mil ga.e vo to usī duniyā kā chakkar chāhiye

un ko roz ek taza hila ek KHanjar chahiye

hum ko roz ek jaan nai aur ek naya sar chahiye

iltifat o sargirani par KHushi kya ranj kya

kuchh bahana is se baDh kar dida-e-tar chahiye

kya dikhaen KHushk lab do bund ke saqi hain sab

pyas sahra-e-azal us ko samundar chahiye

sach ki ek nannhi si konpal ko kuchalne ke liye

jhuT aur dushnam ke lashkar ke lashkar chahiye

sabr ka daman-e-daulat hai amiron ka amir

jabr ki daryuzgi ko sainkaDon dar chahiye

but banane pujne phir toDne ke waste

KHud-parasti ko naya har roz patthar chahiye

hum ne jis duniya ko Thukraya tha un ke waste

mil gae wo to usi duniya ka chakkar chahiye