un se un jaisi rawish apnaen kya

un se un jaisī ravish apnā.eñ kyā

apnī hī nazroñ meñ ham gir jaa.eñ kyā

apnī rūdād-e-alam dohrā.eñ kyā

sāmne haiñ vo unheñ sharmā.eñ kyā

bik rahe haiñ jis tarah ahl-e-suḳhan

ham bhī un hī kī tarah bik jaa.eñ kyā

manzil-e-maqsūd to nazroñ meñ hai

mushkilāt-e-rāh se ghabrā.eñ kyā

hashr jo honā hai vo ho jā.egā

kūcha-e-jānāñ se ab ham jaa.eñ kyā

ḳhud-pasandī hai tumhārī bazm meñ

daad apne fan kī ham yaañ paa.eñ kyā

ishq kī garmī se haiñ ham faizyāb

garmī-e-māhaul se ghabrā.eñ kyā

ta.ane bhī hañs kar suneñge ġhair ke

ishq meñ rusvā.ī se Dar jaa.eñ kyā

shaiḳh sāhib se to an-ban ho ga.ī

ghar barahman ke bhī ab na jaa.eñ kyā

vo to shā.ir ho gayā hai ai 'nadīm'

raah par 'āqib' ko ab ham laa.eñ kyā

un se un jaisi rawish apnaen kya

apni hi nazron mein hum gir jaen kya

apni rudad-e-alam dohraen kya

samne hain wo unhen sharmaen kya

bik rahe hain jis tarah ahl-e-suKHan

hum bhi un hi ki tarah bik jaen kya

manzil-e-maqsud to nazron mein hai

mushkilat-e-rah se ghabraen kya

hashr jo hona hai wo ho jaega

kucha-e-jaanan se ab hum jaen kya

KHud-pasandi hai tumhaari bazm mein

dad apne fan ki hum yan paen kya

ishq ki garmi se hain hum faizyab

garmi-e-mahaul se ghabraen kya

tane bhi hans kar sunenge ghair ke

ishq mein ruswai se Dar jaen kya

shaiKH sahib se to an-ban ho gai

ghar barahman ke bhi ab na jaen kya

wo to shair ho gaya hai ai 'nadim'

rah par 'aqib' ko ab hum laen kya