unhen mujhse go kuchh shikayat nahin hai

unheñ mujh se go kuchh shikāyat nahīñ hai

ġhazab hai ki phir bhī ināyat nahīñ hai

pilā de mujhe apne hāthoñ se saaqī

saḳhāvat meñ koī nadāmat nahīñ hai

sitam jāñ-nisāroñ pe din raat karnā

mohabbat nahīñ hai muravvat nahīñ hai

uf itnā takabbur ḳhudā.ī kā da.avā

buto tum ko ḳhauf-e-qayāmat nahīñ hai

kareñ āh-o-fariyād kyā ham qafas meñ

ki āh-o-fuġhāñ kī ijāzat nahīñ hai

azal se butoñ kī parastish hai hotī

nayā ye tarīq-e-ibādat nahīñ hai

'naresh' un ke zulmoñ kā shikva na hogā

ki fariyād kī mujh ko aadat nahīñ hai

unhen mujh se go kuchh shikayat nahin hai

ghazab hai ki phir bhi inayat nahin hai

pila de mujhe apne hathon se saqi

saKHawat mein koi nadamat nahin hai

sitam jaan-nisaron pe din raat karna

mohabbat nahin hai murawwat nahin hai

uf itna takabbur KHudai ka dawa

buto tum ko KHauf-e-qayamat nahin hai

karen aah-o-fariyaad kya hum qafas mein

ki aah-o-fughan ki ijazat nahin hai

azal se buton ki parastish hai hoti

naya ye tariq-e-ibaadat nahin hai

'naresh' un ke zulmon ka shikwa na hoga

ki fariyaad ki mujh ko aadat nahin hai