unhen nigah hai apne jamal hi ki taraf

unheñ nigāh hai apne jamāl hī kī taraf

nazar uThā ke nahīñ dekhte kisī kī taraf

tavajjoh apnī ho kyā fann-e-shā.irī kī taraf

nazar har ek kī jaatī hai aib hī kī taraf

likhā huā hai jo ronā mire muqaddar meñ

ḳhayāl tak nahīñ jaatā kabhī hañsī kī taraf

tumhārā saaya bhī jo log dekh lete haiñ

vo aañkh uThā ke nahīñ dekhte parī kī taraf

balā meñ phañstā hai dil muft jaan jaatī hai

ḳhudā kisī ko na le jaa.e us galī kī taraf

kabhī jo hotī hai takrār ġhair se ham se

to dil se hote ho dar-parda tum usī kī taraf

nigāh paḌtī hai un par tamām mahfil kī

vo aañkh uThā ke nahīñ dekhte kisī kī taraf

nigāh us but-e-ḳhud-bīñ kī hai mire dil par

na aa.ine kī taraf hai na aarsī kī taraf

qubūl kījiye lillāh tohfa-e-dil ko

nazar na kījiye is kī shikastagī kī taraf

yahī nazar hai jo ab qātil-e-zamāna huī

yahī nazar hai ki uThtī na thī kisī kī taraf

ġharīb-ḳhāna meñ lillāh do-ghaḌī baiTho

bahut dinoñ meñ tum aa.e ho is galī kī taraf

zarā sī der hī ho jā.egī to kyā hogā

ghaḌī ghaḌī na uThāo nazar ghaḌī kī taraf

jo ghar meñ pūchhe koī ḳhauf kyā hai kah denā

chale ga.e the Tahalte hue kisī kī taraf

hazār jalva-e-husn-e-butāñ ho ai 'akbar'

tum apnā dhyān lagā.e raho usī kī taraf

unhen nigah hai apne jamal hi ki taraf

nazar uTha ke nahin dekhte kisi ki taraf

tawajjoh apni ho kya fann-e-shairi ki taraf

nazar har ek ki jati hai aib hi ki taraf

likha hua hai jo rona mere muqaddar mein

KHayal tak nahin jata kabhi hansi ki taraf

tumhaara saya bhi jo log dekh lete hain

wo aankh uTha ke nahin dekhte pari ki taraf

bala mein phansta hai dil muft jaan jati hai

KHuda kisi ko na le jae us gali ki taraf

kabhi jo hoti hai takrar ghair se hum se

to dil se hote ho dar-parda tum usi ki taraf

nigah paDti hai un par tamam mahfil ki

wo aankh uTha ke nahin dekhte kisi ki taraf

nigah us but-e-KHud-bin ki hai mere dil par

na aaine ki taraf hai na aarsi ki taraf

qubul kijiye lillah tohfa-e-dil ko

nazar na kijiye is ki shikastagi ki taraf

yahi nazar hai jo ab qatil-e-zamana hui

yahi nazar hai ki uThti na thi kisi ki taraf

gharib-KHana mein lillah do-ghaDi baiTho

bahut dinon mein tum aae ho is gali ki taraf

zara si der hi ho jaegi to kya hoga

ghaDi ghaDi na uThao nazar ghaDi ki taraf

jo ghar mein puchhe koi KHauf kya hai kah dena

chale gae the Tahalte hue kisi ki taraf

hazar jalwa-e-husn-e-butan ho ai 'akbar'

tum apna dhyan lagae raho usi ki taraf