unhin ki shah se unhen mat karta rahta hun

unhīñ kī shah se unheñ maat kartā rahtā huuñ

sitamgaroñ kī mudārāt kartā rahtā huuñ

yahāñ koī nahīñ suntā hadis-e-dil-zadagāñ

magar maiñ aur tarah baat kartā rahtā huuñ

bhalā ye umr koī kārobār-e-shauq kī hai

bas ik talāfi-e-māfāt kartā rahtā huuñ

ye kā.enāt mire bāl-o-par ke bas kī nahīñ

to kyā karūñ safar-e-zāt kartā rahtā huuñ

yahīñ pe vār-e-harīfāñ uThānā paḌtā hai

yahīñ hisāb-e-musāvāt kartā rahtā huuñ

ajab nahīñ kisī koshish meñ kāmrāñ ho jā.ūñ

mohabbatoñ kī shurūāt kartā rahtā huuñ

hamesha kāsa-e-ḳhālī chhalaktā rahtā hai

faqīr huuñ so karāmāt kartā rahtā huuñ

unhin ki shah se unhen mat karta rahta hun

sitamgaron ki mudaraat karta rahta hun

yahan koi nahin sunta hadis-e-dil-zadagan

magar main aur tarah baat karta rahta hun

bhala ye umr koi karobar-e-shauq ki hai

bas ek talafi-e-mafat karta rahta hun

ye kaenat mere baal-o-par ke bas ki nahin

to kya karun safar-e-zat karta rahta hun

yahin pe war-e-harifan uThana paDta hai

yahin hisab-e-musawat karta rahta hun

ajab nahin kisi koshish mein kaamran ho jaun

mohabbaton ki shuruat karta rahta hun

hamesha kasa-e-KHali chhalakta rahta hai

faqir hun so karamat karta rahta hun