unnab-e-lab ka apne maza kuchh na puchhiye

unnāb-e-lab kā apne mazā kuchh na pūchhiye

kis dard ke haiñ aap davā kuchh na pūchhiye

nāz-o-niyāz-e-āshiq-o-ma.ashūq kyā kahūñ

ijz o ġhurūr shaah o gadā kuchh na pūchhiye

ḳhushbū se ho rahā hai mo.attar dimāġh jaan

chaltī hai kis taraf kī havā kuchh na pūchhiye

kyā kyā nigah phisaltī hai ruḳhsār-e-yār par

kaisā ye aa.ina hai safā kuchh na pūchhiye

jaama se bāhar apne jo huuñ maiñ ajab nahīñ

khole haiñ kis ke band-e-qabā kuchh na pūchhiye

ā.īna le ke kījiye itnā mushāhida

ham se sulūk-e-sharm-o-hayā kuchh na pūchhiye

allāh ne kiyā hai kise bādshāh-e-husn

sar par hai kis ke zill-e-humā kuchh na pūchhiye

rañgīñ kiye haiñ yaar ne jaise ki dast-o-pā

kyā rañg lā rahī hai hinā kuchh na pūchhiye

nā-guftanī hai ishq-e-butāñ kā muāmla

har haal meñ hai shukr-e-ḳhudā kuchh na pūchhiye

kyā shai hai vo kamar jo guzartā hai ye ḳhayāl

aatī hai ġhaib se ye sadā kuchh na pūchhiye

kotāh ḳhāl-e-rū-e-munavvar hai kis qadar

kitnī hai zulf-e-yār rasā kuchh na pūchhiye

'ātish' gunāh-e-ishq kī ta.azīr kyā kahūñ

mushfiq jo kuchh hai us kī sazā kuchh na pūchhiye

unnab-e-lab ka apne maza kuchh na puchhiye

kis dard ke hain aap dawa kuchh na puchhiye

naz-o-niyaz-e-ashiq-o-mashuq kya kahun

ijz o ghurur shah o gada kuchh na puchhiye

KHushbu se ho raha hai moattar dimagh jaan

chalti hai kis taraf ki hawa kuchh na puchhiye

kya kya nigah phisalti hai ruKHsar-e-yar par

kaisa ye aaina hai safa kuchh na puchhiye

jama se bahar apne jo hun main ajab nahin

khole hain kis ke band-e-qaba kuchh na puchhiye

aaina le ke kijiye itna mushahida

hum se suluk-e-sharm-o-haya kuchh na puchhiye

allah ne kiya hai kise baadshah-e-husn

sar par hai kis ke zill-e-huma kuchh na puchhiye

rangin kiye hain yar ne jaise ki dast-o-pa

kya rang la rahi hai hina kuchh na puchhiye

na-guftani hai ishq-e-butan ka muamla

har haal mein hai shukr-e-KHuda kuchh na puchhiye

kya shai hai wo kamar jo guzarta hai ye KHayal

aati hai ghaib se ye sada kuchh na puchhiye

kotah KHal-e-ru-e-munawwar hai kis qadar

kitni hai zulf-e-yar rasa kuchh na puchhiye

'atish' gunah-e-ishq ki tazir kya kahun

mushfiq jo kuchh hai us ki saza kuchh na puchhiye