uns apne mein kahin paya na begane mein tha

uns apne meñ kahīñ paayā na begāne meñ thā

kyā nasha hai saarā aalam ek paimāne meñ thā

aah itnī kāvisheñ ye shor-o-shar ye iztirāb

ek chuTkī ḳhaak kī do par ye parvāne meñ thā

aap hī us ne anal-haq kah diyā ilzām kyā

hosh kis ne le liyā thā hosh dīvāne meñ thā

allāh allāh ḳhaak meñ milte hī ye pā-e-samar

lo ḳhudā kī shaan phal bhī phuul bhī daane meñ thā

shaiḳh ko jo pārsā kahtā hai us ko kyā kahūñ

maiñ ne apnī aañkh se dekhā vo mai-ḳhāne meñ thā

'shā.ir'-e-nāzuk-tabī.at huuñ mirā dil kaT gayā

sāqiyā lenā ki shāyad baal paimāne meñ thā

uns apne mein kahin paya na begane mein tha

kya nasha hai sara aalam ek paimane mein tha

aah itni kawishen ye shor-o-shar ye iztirab

ek chuTki KHak ki do par ye parwane mein tha

aap hi us ne anal-haq kah diya ilzam kya

hosh kis ne le liya tha hosh diwane mein tha

allah allah KHak mein milte hi ye pa-e-samar

lo KHuda ki shan phal bhi phul bhi dane mein tha

shaiKH ko jo parsa kahta hai us ko kya kahun

main ne apni aankh se dekha wo mai-KHane mein tha

'shair'-e-nazuk-tabiat hun mera dil kaT gaya

saqiya lena ki shayad baal paimane mein tha