unwan badal gae hain fasane badal gae

unvān badal ga.e haiñ fasāne badal ga.e

tū bhī badal ki ab to zamāne badal ga.e

dil meñ na rakh dabā ke tamanna kī bijliyāñ

aksar inhī se ā.ina-ḳhāne badal ga.e

ham se mohabbatoñ kī kahānī na pūchhiye

sab tiir chal chuke to nishāne badal ga.e

jis husn kī talāsh meñ sadiyoñ ravāñ rahe

pahuñche vahāñ to log suhāne badal ga.e

jazbāt-e-ishq ne na.ī rāheñ talāsh liiñ

arbāb-e-husn ke bhī bahāne badal ga.e

ḳhat ko kabūtaroñ kī zarūrat nahīñ rahī

jaade payām-bar ke purāne badal ga.e

rahnā sañvar ke husn kā fitrī mizāj hai

gesū badal ga.e haiñ to shāne badal ga.e

sāz-e-qadīm raunaq-e-bazm-e-tarab nahīñ

mastī badal ga.ī hai tarāne badal ga.e

sūrat badal ga.ī hai jazīroñ kī is tarah

jaise samundaroñ ke Thikāne badal ga.e

sajtī haiñ parkoñ meñ hasīnoñ kī mahfileñ

lazzat badal ga.ī hai to khāne badal ga.e

europe sañvārne ke azā.em the shaiḳh ke

pahuñche vahāñ to apne gharāne badal ga.e

badlī rutoñ kī raushnī 'shāhīñ' ajiib hai

kuchh log kah rahe haiñ ki thāne badal ga.e

unwan badal gae hain fasane badal gae

tu bhi badal ki ab to zamane badal gae

dil mein na rakh daba ke tamanna ki bijliyan

aksar inhi se aaina-KHane badal gae

hum se mohabbaton ki kahani na puchhiye

sab tir chal chuke to nishane badal gae

jis husn ki talash mein sadiyon rawan rahe

pahunche wahan to log suhane badal gae

jazbaat-e-ishq ne nai rahen talash lin

arbab-e-husn ke bhi bahane badal gae

KHat ko kabutaron ki zarurat nahin rahi

jade payam-bar ke purane badal gae

rahna sanwar ke husn ka fitri mizaj hai

gesu badal gae hain to shane badal gae

saz-e-qadim raunaq-e-bazm-e-tarab nahin

masti badal gai hai tarane badal gae

surat badal gai hai jaziron ki is tarah

jaise samundaron ke Thikane badal gae

sajti hain parkon mein hasinon ki mahfilen

lazzat badal gai hai to khane badal gae

europe sanwarne ke azaem the shaiKH ke

pahunche wahan to apne gharane badal gae

badli ruton ki raushni 'shahin' ajib hai

kuchh log kah rahe hain ki thane badal gae