sab ki izzat sab se mohabbat urdu bolne wala hun

sab kī izzat sab se mohabbat urdu bolne vaalā huuñ

dhīmā lahja narm tabī.at urdu bolne vaalā huuñ

sab kī zabāñ se naam thā un kā ye merī pahchān banī

faḳhr mirā hai ik yahī nisbat urdu bolne vaalā huuñ

dhartī kā avval beTā huuñ dhartī bhī maañ hotī hai

sahl nahīñ thā kār-e-hijrat urdu bolne vaalā huuñ

taur-tarīqe aur qarīne sīkhoge uslūb ka.ī

likhne baiTho bāb-e-fasāhat urdu bolne vaalā huuñ

tarz-e-taḳhātub tarz-e-takallum hai is meñ tahzīb chhupī

sīkho rasm-o-rīt rivāyat urdu bolne vaalā huuñ

maal matā.a to chhoḌ aa.e the besh-bahā ik chiiz thī bas

so paa.ī anmol virāsat urdu bolne vaalā huuñ

sab ki izzat sab se mohabbat urdu bolne wala hun

dhima lahja narm tabiat urdu bolne wala hun

sab ki zaban se nam tha un ka ye meri pahchan bani

faKHr mera hai ek yahi nisbat urdu bolne wala hun

dharti ka awwal beTa hun dharti bhi man hoti hai

sahl nahin tha kar-e-hijrat urdu bolne wala hun

taur-tariqe aur qarine sikhoge uslub kai

likhne baiTho bab-e-fasahat urdu bolne wala hun

tarz-e-taKHatub tarz-e-takallum hai is mein tahzib chhupi

sikho rasm-o-rit riwayat urdu bolne wala hun

mal mataa to chhoD aae the besh-baha ek chiz thi bas

so pai anmol wirasat urdu bolne wala hun