uruj auron ko kuchh din hai ahrman ki tarah

'urūj auroñ ko kuchh din hai ahrman kī tarah

faroġh kis ko hai rindoñ ke bāñkpan kī tarah

mirā ḳhayāl nahīñ hai to aur kyā hogā

guzar gayā tire māthe se jo shikan kī tarah

ye sar-zamīn-e-gul-o-lāla so bhī jaatī hai

libāda barf kā oḌhe hue kafan kī tarah

kabhī to guzrūñgā is rahguzār se ho kar

ḳhud apnī taak meñ baiThā huuñ rāhzan kī tarah

ḳhizāñ kā ḳhauf mujhe khaa.e jā rahā hai 'kamāl'

chinār surḳh na hoñ ātish-e-suḳhan kī tarah

'uruj auron ko kuchh din hai ahrman ki tarah

farogh kis ko hai rindon ke bankpan ki tarah

mera KHayal nahin hai to aur kya hoga

guzar gaya tere mathe se jo shikan ki tarah

ye sar-zamin-e-gul-o-lala so bhi jati hai

libaada barf ka oDhe hue kafan ki tarah

kabhi to guzrunga is rahguzar se ho kar

KHud apni tak mein baiTha hun rahzan ki tarah

KHizan ka KHauf mujhe khae ja raha hai 'kamal'

chinar surKH na hon aatish-e-suKHan ki tarah