uryaniyat ki auj-e-surayya mein phans gae

uryāniyat kī auj-e-surayyā meñ phañs ga.e

vahshat meñ log raqs-e-barahna meñ phañs ga.e

duniyā jo dī thī rab ne hameñ us ko chhoḌ kar

ham log jaane kaun sī duniyā meñ phañs ga.e

ye soch kar ki zill-e-ilāhī hoñ ḳhair-ḳhvāh

achchhe-bhale bhī qibla-o-ka.aba meñ phañs ga.e

phañsnā hī jin ke apne muqaddar kā khel thā

ik dasht se vo nikle to sahrā meñ phañs ga.e

sāhil pe bhī hai ḳhuub bhañvar jaisā ehtimām

āḳhir ham aa ke kaun se dariyā meñ phañs ga.e

ye bhuul kar ki kaise sañvartī hai āqibat

sab apnī apnī ḳhvāhish-e-bejā meñ phañs ga.e

'shāhid' rumūz-e-shā.erī laa.eñ kahāñ se ham

matl.a huā to aaj bhī iitā meñ phañs ga.e

uryaniyat ki auj-e-surayya mein phans gae

wahshat mein log raqs-e-barahna mein phans gae

duniya jo di thi rab ne hamein us ko chhoD kar

hum log jaane kaun si duniya mein phans gae

ye soch kar ki zill-e-ilahi hon KHair-KHwah

achchhe-bhale bhi qibla-o-kaba mein phans gae

phansna hi jin ke apne muqaddar ka khel tha

ek dasht se wo nikle to sahra mein phans gae

sahil pe bhi hai KHub bhanwar jaisa ehtimam

aaKHir hum aa ke kaun se dariya mein phans gae

ye bhul kar ki kaise sanwarti hai aaqibat

sab apni apni KHwahish-e-beja mein phans gae

'shahid' rumuz-e-shaeri laen kahan se hum

matla hua to aaj bhi ita mein phans gae