us but-e-kafir ko un ka dhyan kya hai kuchh nahin

us but-e-kāfir ko un kā dhyān kyā hai kuchh nahīñ

diin kyā hai kuchh nahīñ īmān kyā hai kuchh nahīñ

nazr karne ke liye sāmān kyā hai kuchh nahīñ

jaan hai ab aur merī jaan kyā hai kuchh nahīñ

ḳhaak se paidā huā ye ḳhaak meñ mil jā.egā

ḳhāk-dān-e-dahr meñ insān kyā hai kuchh nahīñ

chāhtā huuñ maiñ ki chāheñ aap bhī dil se mujhe

hai yahī armān aur armān kyā hai kuchh nahīñ

har ghaḌī zulm-o-sitam har dam vahī qahr-o-itāb

aap ke nazdīk merī jaan kyā hai kuchh nahīñ

maiñ faqīr-e-be-ġharaz huuñ be-ġharaz ke vāste

naf.a kyā hai kuchh nahīñ nuqsān kyā hai kuchh nahīñ

marne vaale luTne vaale miTne vaale ke liye

jaan kyā hai aan kyā hai shaan kyā hai kuchh nahīñ

teġh ne gardan judā kī maut ne lī jān-e-zār

mere sar par aap kā ehsān kyā hai kuchh nahīñ

jab kaho qurbān kar duuñ jab kaho kar duuñ nisār

ye zarā sā dil zarā sī jaan kyā hai kuchh nahīñ

kyā kahā ham ko bahut kuchh ġham-zadoñ kā dhyān hai

tum ko apne ġham-zadoñ kā dhyān kyā hai kuchh nahīñ

har hasīñ par us ko marnā aur use ġham jhelnā

dil salāmat hai to merī jaan kyā hai kuchh nahīñ

sar paTakne ko faqat do-chār patthar rakh liye

aur mere ghar meñ ab sāmān kyā hai kuchh nahīñ

ḳhair jo zulm-o-sitam karne the vo tum ne kiye

pichhlī bātoñ kā hameñ ab dhyān kyā hai kuchh nahīñ

maiñ ye un se kyuuñ kahūñ tum āshiqoñ kī jaan ho

jāntā huuñ āshiqoñ kī jaan kyā hai kuchh nahīñ

ho ga.ī ġharqāb duniyā bhar gayā saarā jahāñ

ab to kahiye 'nūh' kā tūfān kyā hai kuchh nahīñ

us but-e-kafir ko un ka dhyan kya hai kuchh nahin

din kya hai kuchh nahin iman kya hai kuchh nahin

nazr karne ke liye saman kya hai kuchh nahin

jaan hai ab aur meri jaan kya hai kuchh nahin

KHak se paida hua ye KHak mein mil jaega

KHak-dan-e-dahr mein insan kya hai kuchh nahin

chahta hun main ki chahen aap bhi dil se mujhe

hai yahi arman aur arman kya hai kuchh nahin

har ghaDi zulm-o-sitam har dam wahi qahr-o-itab

aap ke nazdik meri jaan kya hai kuchh nahin

main faqir-e-be-gharaz hun be-gharaz ke waste

nafa kya hai kuchh nahin nuqsan kya hai kuchh nahin

marne wale luTne wale miTne wale ke liye

jaan kya hai aan kya hai shan kya hai kuchh nahin

tegh ne gardan juda ki maut ne li jaan-e-zar

mere sar par aap ka ehsan kya hai kuchh nahin

jab kaho qurban kar dun jab kaho kar dun nisar

ye zara sa dil zara si jaan kya hai kuchh nahin

kya kaha hum ko bahut kuchh gham-zadon ka dhyan hai

tum ko apne gham-zadon ka dhyan kya hai kuchh nahin

har hasin par us ko marna aur use gham jhelna

dil salamat hai to meri jaan kya hai kuchh nahin

sar paTakne ko faqat do-chaar patthar rakh liye

aur mere ghar mein ab saman kya hai kuchh nahin

KHair jo zulm-o-sitam karne the wo tum ne kiye

pichhli baaton ka hamein ab dhyan kya hai kuchh nahin

main ye un se kyun kahun tum aashiqon ki jaan ho

jaanta hun aashiqon ki jaan kya hai kuchh nahin

ho gai gharqab duniya bhar gaya sara jahan

ab to kahiye 'nuh' ka tufan kya hai kuchh nahin