us buDhe gadagar se mujhe KHauf laga tha

us būḌhe gadāgar se mujhe ḳhauf lagā thā

andhā thā magar phir bhī mujhe dekh rahā thā

logoñ ne kahā phuul thā so maan gayā maiñ

patthar thā jo us roz mire sar pe girā thā

jo bhiik milī baañT dī auroñ meñ hī maiñ ne

aur shaam ko ḳhālī mirā kashkol paḌā thā

aatā thā nazar saaf mujhe saarā tamāshā

rūmāl agarche mirī āñkhoñ pe bañdhā thā

jo mere tasāhul ke sabab TuuT gayā hai

us TuuTe khilaune se mujhe pyaar baḌā thā

patthar se kuchal aaya thā maiñ jis ko galī meñ

vo saañp to phir mere sirhāne hī khaḌā thā

sarkār ke logoñ ne girā Daalā hai jis ko

vo ghar bhī to rishvat kī kamā.ī se banā thā

us buDhe gadagar se mujhe KHauf laga tha

andha tha magar phir bhi mujhe dekh raha tha

logon ne kaha phul tha so man gaya main

patthar tha jo us roz mere sar pe gira tha

jo bhik mili banT di auron mein hi main ne

aur sham ko KHali mera kashkol paDa tha

aata tha nazar saf mujhe sara tamasha

rumal agarche meri aankhon pe bandha tha

jo mere tasahul ke sabab TuT gaya hai

us TuTe khilaune se mujhe pyar baDa tha

patthar se kuchal aaya tha main jis ko gali mein

wo sanp to phir mere sirhane hi khaDa tha

sarkar ke logon ne gira Dala hai jis ko

wo ghar bhi to rishwat ki kamai se bana tha