us chashm ne ki tutiyon ko nukta-dan kiya

us chashm ne ki tūtiyoñ ko nukta-dāñ kiyā

aisī ki ik nigah ki mujhe be-zabāñ kiyā

ghabrā.ūñ kis tarah dil-e-pur-āh se na maiñ

us soḳhta ne ab to nihāyat dhuāñ kiyā

haal us ne pūchhā jab na rahī tāqat-e-bayāñ

is pūchhne ne aur mujhe be-zabāñ kiyā

yārab tū us ke dil se sadā rakhiyo ġham ko duur

jis ne kisī ke dil ko kabhī shādmāñ kiyā

nairañg be-sabātī kā hai is chaman kā rañg

bulbul ne kyā samajh ke yahāñ āshiyāñ kiyā

mazmūn-e-ḳhat usī se hai zāhir ki hogā kyā

qāsid kī jā jo ashk ko ham ne ravāñ kiyā

gah ishva gah karishma gahe naaz gah adā

kis kis tarah se us ne mujhe imtihāñ kiyā

ḳhūboñ ko ham-nashīñ tū kabhī dil na dījiyo

maiñ is muāmle meñ bahut sāziyāñ kiyā

majnūñ kā ishq sach hai pa mauzūnoñ ne 'razā'

zarra sī baat thī use ik dāstāñ kiyā

us chashm ne ki tutiyon ko nukta-dan kiya

aisi ki ek nigah ki mujhe be-zaban kiya

ghabraun kis tarah dil-e-pur-ah se na main

us soKHta ne ab to nihayat dhuan kiya

haal us ne puchha jab na rahi taqat-e-bayan

is puchhne ne aur mujhe be-zaban kiya

yarab tu us ke dil se sada rakhiyo gham ko dur

jis ne kisi ke dil ko kabhi shadman kiya

nairang be-sabaati ka hai is chaman ka rang

bulbul ne kya samajh ke yahan aashiyan kiya

mazmun-e-KHat usi se hai zahir ki hoga kya

qasid ki ja jo ashk ko hum ne rawan kiya

gah ishwa gah karishma gahe naz gah ada

kis kis tarah se us ne mujhe imtihan kiya

KHubon ko ham-nashin tu kabhi dil na dijiyo

main is muamle mein bahut saziyan kiya

majnun ka ishq sach hai pa mauzunon ne 'raza'

zarra si baat thi use ek dastan kiya