us ka KHayal chashm se shab KHwab le gaya

us kā ḳhayāl chashm se shab ḳhvāb le gayā

qasme ki ishq jī se mire taab le gayā

kin nīñdoñ ab tū sotī hai ai chashm-e-girya-nāk

mizhgāñ to khol shahr ko sailāb le gayā

aave jo mastaba meñ to sun lo ki raah se

vaa.iz ko ek jām-e-mai-e-nāb le gayā

ne dil rahā bajā hai na sabr o havās o hosh

aayā jo sail-e-ishq sab asbāb le gayā

mere huzūr sham.a ne girya jo sar kiyā

royā maiñ is qadar ki mujhe aab le gayā

ahvāl us shikār zubūñ kā hai jaa.e rahm

jis nā-tavāñ ko muft na qassāb le gayā

muñh kī jhalak se yaar ke behosh ho ga.e

shab ham ko 'mīr' partav-e-mahtāb le gayā

us ka KHayal chashm se shab KHwab le gaya

qasme ki ishq ji se mere tab le gaya

kin nindon ab tu soti hai ai chashm-e-girya-nak

mizhgan to khol shahr ko sailab le gaya

aawe jo mastaba mein to sun lo ki rah se

waiz ko ek jam-e-mai-e-nab le gaya

ne dil raha baja hai na sabr o hawas o hosh

aaya jo sail-e-ishq sab asbab le gaya

mere huzur shama ne girya jo sar kiya

roya main is qadar ki mujhe aab le gaya

ahwal us shikar zubun ka hai jae rahm

jis na-tawan ko muft na qassab le gaya

munh ki jhalak se yar ke behosh ho gae

shab hum ko 'mir' partaw-e-mahtab le gaya