uske apne darmiyan istada ek diwar main

us ke apne darmiyāñ istāda ik dīvār maiñ

ek dasht-e-shādmānī us meñ ik āzār maiñ

maiñ nahīñ thā tū hī thā aalam meñ lekin tere ba.ad

ai ḳhudā-e-izz-o-jal terā huā iz.hār maiñ

sham.a se hai nuur jaisā terā merā insilāk

varna tū bahtī havā hai phuul kī mahkār maiñ

baḳht kī sāzish kahūñ yā phir mashiyyat ġhaib kī

tīr-zan koī bhī ho lekin hadaf har baar maiñ

kal talak us kā rahā thā dil ko mere ishtiyāq

aaj vo nazdīk hai par us se huuñ bezār maiñ

ik na ik din to musaḳhḳhar us ko honā hai 'nadīm'

vo ḳhalāoñ kā makīñ hai nuur kī raftār maiñ

us ke apne darmiyan istada ek diwar main

ek dasht-e-shadmani us mein ek aazar main

main nahin tha tu hi tha aalam mein lekin tere baad

ai KHuda-e-izz-o-jal tera hua izhaar main

shama se hai nur jaisa tera mera insilak

warna tu bahti hawa hai phul ki mahkar main

baKHt ki sazish kahun ya phir mashiyyat ghaib ki

tir-zan koi bhi ho lekin hadaf har bar main

kal talak us ka raha tha dil ko mere ishtiyaq

aaj wo nazdik hai par us se hun bezar main

ek na ek din to musaKHKHar us ko hona hai 'nadim'

wo KHalaon ka makin hai nur ki raftar main