uske dar tak kise rasai hai

us ke dar tak kise rasā.ī hai

vo hī jā.egā jis kī aa.ī hai

baat ik dil meñ mere aa.ī hai

gar kahūñ to abhī laḌā.ī hai

dūsrī jaan hai tirī ulfat

ek khoī hai ek paa.ī hai

bhar diyā zaḳhm meñ namak us ne

ye duā-go kī muñh-bharā.ī hai

sach hai be-aib hai ḳhudā kī zaat

tujh meñ kyā jaane kyā burā.ī hai

ai lab-e-yār tujh ko merī qasam

kabhī sachchī qasam bhī khaa.ī hai

us ke dar tak pahuñch gayā qāsid

aage taqdīr kī rasā.ī hai

qatl kartī hai guftugū un kī

baat meñ baat kī safā.ī hai

'dāġh' ab vasl kā visāl huā

yaar zinda ġham-e-judā.ī hai

us ke dar tak kise rasai hai

wo hi jaega jis ki aai hai

baat ek dil mein mere aai hai

gar kahun to abhi laDai hai

dusri jaan hai teri ulfat

ek khoi hai ek pai hai

bhar diya zaKHm mein namak us ne

ye dua-go ki munh-bharai hai

sach hai be-aib hai KHuda ki zat

tujh mein kya jaane kya burai hai

ai lab-e-yar tujh ko meri qasam

kabhi sachchi qasam bhi khai hai

us ke dar tak pahunch gaya qasid

aage taqdir ki rasai hai

qatl karti hai guftugu un ki

baat mein baat ki safai hai

'dagh' ab wasl ka visal hua

yar zinda gham-e-judai hai