uske jate hi ye kya ho gai ghar ki surat

us ke jaate hī ye kyā ho ga.ī ghar kī sūrat

na vo dīvār kī sūrat hai na dar kī sūrat

kis se paimān-e-vafā bāñdh rahī hai bulbul

kal na pahchān sakegī gul-e-tar kī sūrat

hai ġham-e-roz-e-judā.ī na nashāt-e-shab-e-vasl

ho ga.ī aur hī kuchh shām-o-sahar kī sūrat

apnī jeboñ se raheñ saare namāzī hushyār

ik buzurg aate haiñ masjid meñ ḳhizar kī sūrat

dekhiye shaiḳh musavvir se khiche yā na khiche

sūrat aur aap se be-aib bashar kī sūrat

vā.izo ātish-e-dozaḳh se jahāñ ko tum ne

ye Darāyā hai ki ḳhud ban ga.e Dar kī sūrat

kyā ḳhabar zāhid-e-qāne ko ki kyā chiiz hai hirs

us ne dekhī hī nahīñ kīsa-e-zar kī sūrat

maiñ bachā tīr-e-havādis se nishāna ban kar

aaḌe aa.ī mirī taslīm-e-sipar kī sūrat

shauq meñ us ke mazā dard meñ us ke lazzat

nāseho us se nahīñ koī mafar kī sūrat

hamla apne pe bhī ik bād-e-hazīmat hai zarūr

rah ga.ī hai yahī ik fat.h o zafar kī sūrat

rahnumāoñ ke hue jaate haiñ ausān ḳhatā

raah meñ kuchh nazar aatī hai ḳhatar kī sūrat

yuuñ to aayā hai tabāhī meñ ye beḌā sau baar

par Darātī hai bahut aaj bhañvar kī sūrat

un ko 'hālī' bhī bulāte haiñ ghar apne mehmāñ

dekhnā aap kī aur aap ke ghar kī sūrat

us ke jate hi ye kya ho gai ghar ki surat

na wo diwar ki surat hai na dar ki surat

kis se paiman-e-wafa bandh rahi hai bulbul

kal na pahchan sakegi gul-e-tar ki surat

hai gham-e-roz-e-judai na nashat-e-shab-e-wasl

ho gai aur hi kuchh sham-o-sahar ki surat

apni jebon se rahen sare namazi hushyar

ek buzurg aate hain masjid mein KHizar ki surat

dekhiye shaiKH musawwir se khiche ya na khiche

surat aur aap se be-aib bashar ki surat

waizo aatish-e-dozaKH se jahan ko tum ne

ye Daraya hai ki KHud ban gae Dar ki surat

kya KHabar zahid-e-qane ko ki kya chiz hai hirs

us ne dekhi hi nahin kisa-e-zar ki surat

main bacha tir-e-hawadis se nishana ban kar

aaDe aai meri taslim-e-sipar ki surat

shauq mein us ke maza dard mein us ke lazzat

naseho us se nahin koi mafar ki surat

hamla apne pe bhi ek baad-e-hazimat hai zarur

rah gai hai yahi ek fath o zafar ki surat

rahnumaon ke hue jate hain ausan KHata

rah mein kuchh nazar aati hai KHatar ki surat

yun to aaya hai tabahi mein ye beDa sau bar

par Daraati hai bahut aaj bhanwar ki surat

un ko 'haali' bhi bulate hain ghar apne mehman

dekhna aap ki aur aap ke ghar ki surat