uske nibhne ke kuchh nahin asbab

us ke nibhne ke kuchh nahīñ asbāb

vo taġhāful-shi.ār maiñ be-tāb

vājib-ul-qatl hai dil-e-betāb

kushta honā hī ḳhuub hai sīmāb

abr kī tīrgī meñ ham ko to

sūjhtā kuchh nahīñ sivā.e sharāb

apnī kashtī kā hai ḳhudā-hāfiz

pīchhe tūfāñ hai sāmne girdāb

bosa māñgā to ye javāb milā

sīkhiye pahle ishq ke ādāb

us ko phirtā hai DhūñDhtā har-sū

kyuuñ kar āñkhoñ se uḌ na jaa.e ḳhvāb

dard-e-ulfat jo hote hī marte

ye aziyyat na khīñchte ahbāb

nahīñ mumkin ki jam.a hoñ donoñ

sāqī-e-mehr-vash shab-e-mahtāb

sāmne us ke jo Thahar jaa.eñ

nahīñ be-tābiyoñ ko itnī taab

ahl-e-ālam se chāhtā huuñ vafā

us kā tālib huuñ jo ki hai nāyāb

ishq ke saath hī ga.e dil-o-dīñ

aa ga.ī sail bah gayā asbāb

saaf fiqre huuñ aur hamīñ par hoñ

sheva achchhā to hai mirā ādāb

hotī gar is jahāñ meñ kuchh ḳhūbī

kahte kyuuñ phir sifat meñ is kī ḳharāb

āzmānā na dil ko saḳhtī se

TuuT jaa.e na ye dur-e-nāyāb

kis tarah bahr-e-ishq se niklūñ

ye to dariyā kahīñ nahīñ pāyāb

sho.ala-e-husn terā kyā kahnā

phūñk de us ke parda-hā-e-hijāb

us kī shoḳhī kā hai ta.ajjub kyā

husn ye kuchh aur us pe ain shabāb

'ġhālib' aa.e haiñ laao ai 'majrūh'

bāda-e-nāb meñ milā ke gulāb

us ke nibhne ke kuchh nahin asbab

wo taghaful-shiar main be-tab

wajib-ul-qatl hai dil-e-betab

kushta hona hi KHub hai simab

abr ki tirgi mein hum ko to

sujhta kuchh nahin siwae sharab

apni kashti ka hai KHuda-hafiz

pichhe tufan hai samne girdab

bosa manga to ye jawab mila

sikhiye pahle ishq ke aadab

us ko phirta hai DhunDhta har-su

kyun kar aankhon se uD na jae KHwab

dard-e-ulfat jo hote hi marte

ye aziyyat na khinchte ahbab

nahin mumkin ki jama hon donon

saqi-e-mehr-wash shab-e-mahtab

samne us ke jo Thahar jaen

nahin be-tabiyon ko itni tab

ahl-e-alam se chahta hun wafa

us ka talib hun jo ki hai nayab

ishq ke sath hi gae dil-o-din

aa gai sail bah gaya asbab

saf fiqre hun aur hamin par hon

shewa achchha to hai mera aadab

hoti gar is jahan mein kuchh KHubi

kahte kyun phir sifat mein is ki KHarab

aazmana na dil ko saKHti se

TuT jae na ye dur-e-nayab

kis tarah bahr-e-ishq se niklun

ye to dariya kahin nahin payab

shoala-e-husn tera kya kahna

phunk de us ke parda-ha-e-hijab

us ki shoKHi ka hai tajjub kya

husn ye kuchh aur us pe ain shabab

'ghaalib' aae hain lao ai 'majruh'

baada-e-nab mein mila ke gulab