uski aankhon ka koi KHwab nahin ho pae

us kī āñkhoñ kā koī ḳhvāb nahīñ ho paa.e

hans the vāqif-e-tālāb nahīñ ho paa.e

girya-e-ġham kī harārat se pighalte hue ashk

sard lahjoñ se bhī barfāb nahīñ ho paa.e

tum ne jī bhar ke mohabbat kī 'ināyat kī thī

dasht phir dasht the sairāb nahīñ ho paa.e

hijr ne taur tarīqe to sikhā.e ġham ke

ham magar mā.il-e-ādāb nahīñ ho paa.e

ek din tujh ko āchānak ye ḳhabar aa.egī

tere bīmār shifā-yāb nahīñ ho paa.e

mujh pe kyā aatā gul-e-surḳh kā mausam 'komal'

jab mire peḌ hī shādāb nahīñ ho paa.e

us ki aankhon ka koi KHwab nahin ho pae

hans the waqif-e-talab nahin ho pae

girya-e-gham ki hararat se pighalte hue ashk

sard lahjon se bhi barfab nahin ho pae

tum ne ji bhar ke mohabbat ki 'inayat ki thi

dasht phir dasht the sairab nahin ho pae

hijr ne taur tariqe to sikhae gham ke

hum magar mail-e-adab nahin ho pae

ek din tujh ko aachanak ye KHabar aaegi

tere bimar shifa-yab nahin ho pae

mujh pe kya aata gul-e-surKH ka mausam 'komal'

jab mere peD hi shadab nahin ho pae