uski duzdida-nigahi dekhna achchha laga

us kī duzdīda-nigāhī dekhnā achchhā lagā

bhiiḌ meñ ik ajnabī kā sāmnā achchhā lagā

jis kī tasvīr-e-tasavvur zehn meñ mahfūz hai

jāda-e-ulfat meñ us ko DhūñDhnā achchhā lagā

gholnā kānoñ meñ ras shīrīnī-e-guftār se

rūh-parvar us kā hañsnā bolnā achchhā lagā

murta.ish hotā hai jis ko dekh kar tār-e-nafas

us kā zulf ḳham-ba-ḳham kā kholnā achchhā lagā

dil se dil ko raah hotī hai ye hai us kā subūt

jaate jaate us kā muḌ kar dekhnā achchhā lagā

vajd-āvar thā gul-o-bulbul kā rabt-e-bāhamī

ġhuncha-o-gul se chaman meñ khelnā achchhā lagā

hai jahān-e-rañg-o-bū meñ husn jis kā intiḳhāb

us kā honā bazm meñ jalva-numā achchhā lagā

mere siine meñ dhaḌaktā hai dil-e-dard-āshnā

is liye TuuTe hue dil joḌnā achchhā lagā

mun.akis har chiiz meñ hotā hai 'barqī' jis kā aks

us kā chehra ā.ina-dar-ā.ina achchhā lagā

us ki duzdida-nigahi dekhna achchha laga

bhiD mein ek ajnabi ka samna achchha laga

jis ki taswir-e-tasawwur zehn mein mahfuz hai

jada-e-ulfat mein us ko DhunDhna achchha laga

gholna kanon mein ras shirini-e-guftar se

ruh-parwar us ka hansna bolna achchha laga

murtaish hota hai jis ko dekh kar tar-e-nafas

us ka zulf KHam-ba-KHam ka kholna achchha laga

dil se dil ko rah hoti hai ye hai us ka subut

jate jate us ka muD kar dekhna achchha laga

wajd-awar tha gul-o-bulbul ka rabt-e-bahami

ghuncha-o-gul se chaman mein khelna achchha laga

hai jahan-e-rang-o-bu mein husn jis ka intiKHab

us ka hona bazm mein jalwa-numa achchha laga

mere sine mein dhaDakta hai dil-e-dard-ashna

is liye TuTe hue dil joDna achchha laga

munakis har chiz mein hota hai 'barqi' jis ka aks

us ka chehra aaina-dar-aina achchha laga