uski gali mein zarf se baDh kar mila mujhe

us kī galī meñ zarf se baḌh kar milā mujhe

ik pyāla justujū thī samundar milā mujhe

maiñ chal paḌā thā aur kisī shāhrāh par

ḳhanjar-ba-dast yādoñ kā lashkar milā mujhe

dariyā-e-shab se paar utarnā muhāl thā

TuuTā huā safīna-e-ḳhāvar milā mujhe

tāroñ meñ us kā aks hai phūloñ meñ us kā rañg

maiñ jis taraf gayā mirā dilbar milā mujhe

har zarra bā-kamāl hai har pattā be-misāl

duniyā meñ ḳhud se koī na kam-tar milā mujhe

kab se bhaTak rahā huuñ maiñ is dasht meñ magar

ḳhud se kabhī milā na tirā dar milā mujhe

hotā nahīñ hai tujh pe kisī baat kā asar

lagtā hai tere ruup meñ patthar milā mujhe

be-kaif kaT rahī thī musalsal ye zindagī

phir ḳhvāb meñ vo ḳhvāb sā paikar milā mujhe

is baat par karūñgā maiñ din raat ehtijāj

kis jurm meñ ye ḳhaak kā bistar milā mujhe

mujh ko nahīñ rahī kabhī manzar kī justujū

ghar ke qarīb kū-e-sitamgar milā mujhe

jab tak rahā maiñ ḳhud meñ bhaTaktā rahā yahāñ

jab ḳhud ko kho diyā to tirā dar milā mujhe

miTTī meñ DhūñDtā huā kuchh būḌhā āsmāñ

maiñ jis taraf gayā yahī manzar milā mujhe

karte haiñ log husn se yaañ nā-ravā sulūk

rote hue hamesha gul-e-tar milā mujhe

us ki gali mein zarf se baDh kar mila mujhe

ek pyala justuju thi samundar mila mujhe

main chal paDa tha aur kisi shahrah par

KHanjar-ba-dast yaadon ka lashkar mila mujhe

dariya-e-shab se par utarna muhaal tha

TuTa hua safina-e-KHawar mila mujhe

taron mein us ka aks hai phulon mein us ka rang

main jis taraf gaya mera dilbar mila mujhe

har zarra ba-kamal hai har patta be-misal

duniya mein KHud se koi na kam-tar mila mujhe

kab se bhaTak raha hun main is dasht mein magar

KHud se kabhi mila na tera dar mila mujhe

hota nahin hai tujh pe kisi baat ka asar

lagta hai tere rup mein patthar mila mujhe

be-kaif kaT rahi thi musalsal ye zindagi

phir KHwab mein wo KHwab sa paikar mila mujhe

is baat par karunga main din raat ehtijaj

kis jurm mein ye KHak ka bistar mila mujhe

mujh ko nahin rahi kabhi manzar ki justuju

ghar ke qarib ku-e-sitamgar mila mujhe

jab tak raha main KHud mein bhaTakta raha yahan

jab KHud ko kho diya to tera dar mila mujhe

miTTi mein DhunDta hua kuchh buDha aasman

main jis taraf gaya yahi manzar mila mujhe

karte hain log husn se yan na-rawa suluk

rote hue hamesha gul-e-tar mila mujhe