uski har baat ne jadu sa kiya tha pahle

us kī har baat ne jaadū sā kiyā thā pahle

kitnā dilchasp kahānī kā ḳhudā thā pahle

ḳhvāb-lamha tirī ḳhushbū meñ basā thā pahle

be-ḳhabar niiñd meñ ik phuul khilā thā pahle

koī tāsīr thī jo ġham ko bhulā detī thī

tere andar koī fankār chhupā thā pahle

ye badan ab tujhe be-rūh khañDar lagtā hai

is havelī meñ ik insān jiyā thā pahle

vaqt par maut kī lazzat bhī nahīñ de paayā

mujh ko vo aadmī hiirā hī lagā thā pahle

ik sweater ne baḌhā dī thī javānī merī

tum ne mere liye ik ḳhvāb bunā thā pahle

maiñ jo kahtā thā vahī baat huā kartī thī

mere ghar meñ koī jaadū kā diyā thā pahle

kaise aatā hai dabe paañv gunāhoñ kā ḳhayāl

kitnī ḳhāmoshī se darvāza khulā thā pahle

jo bhī chehra thā vo apnā sā lagā kartā thā

mai-kada raqs meñ jab jhuum rahā thā pahle

uTh gayā hai to ab is shahr ko le Dūbegā

vahī tūfāñ mire andar jo dabā thā pahle

us ki har baat ne jadu sa kiya tha pahle

kitna dilchasp kahani ka KHuda tha pahle

KHwab-lamha teri KHushbu mein basa tha pahle

be-KHabar nind mein ek phul khila tha pahle

koi tasir thi jo gham ko bhula deti thi

tere andar koi fankar chhupa tha pahle

ye badan ab tujhe be-ruh khanDar lagta hai

is haweli mein ek insan jiya tha pahle

waqt par maut ki lazzat bhi nahin de paya

mujh ko wo aadmi hira hi laga tha pahle

ek sweater ne baDha di thi jawani meri

tum ne mere liye ek KHwab buna tha pahle

main jo kahta tha wahi baat hua karti thi

mere ghar mein koi jadu ka diya tha pahle

kaise aata hai dabe panw gunahon ka KHayal

kitni KHamoshi se darwaza khula tha pahle

jo bhi chehra tha wo apna sa laga karta tha

mai-kada raqs mein jab jhum raha tha pahle

uTh gaya hai to ab is shahr ko le Dubega

wahi tufan mere andar jo daba tha pahle