uski jam-e-jam aankhen shisha-e-badan mera

us kī jām-e-jam āñkheñ shīsha-e-badan merā

us kī band muTThī meñ saarā bāñkpan merā

maiñ ne apne chehre par sab hunar sajā.e the

faash kar gayā mujh ko saada pairahan merā

dil bhī kho gayā shāyad shahr ke sarāboñ meñ

ab mirī tarah se hai dard be-vatan merā

ek dasht-e-ḳhāmoshī ab mirā muqaddar hai

yaad be-sadā terī zaḳhm be-chaman merā

aao aaj ham donoñ apnā apnā ghar chun leñ

tum navāh-e-dil le lo ḳhitta-e-badan merā

roz apne ḳhvāboñ kā ḳhuun kartā rahtā huuñ

haa.e kin ġhanīmoñ se aa paḌā hai ran merā

gaañv kī havāoñ ne phir sandesa bhejā hai

muntazir tumhārā hai ḳhushbuoñ kā ban merā

us ki jam-e-jam aankhen shisha-e-badan mera

us ki band muTThi mein sara bankpan mera

main ne apne chehre par sab hunar sajae the

fash kar gaya mujh ko sada pairahan mera

dil bhi kho gaya shayad shahr ke sarabon mein

ab meri tarah se hai dard be-watan mera

ek dasht-e-KHamoshi ab mera muqaddar hai

yaad be-sada teri zaKHm be-chaman mera

aao aaj hum donon apna apna ghar chun len

tum nawah-e-dil le lo KHitta-e-badan mera

roz apne KHwabon ka KHun karta rahta hun

hae kin ghanimon se aa paDa hai ran mera

ganw ki hawaon ne phir sandesa bheja hai

muntazir tumhaara hai KHushbuon ka ban mera