usko ab ye KHabar karen kyunkar

us ko ab ye ḳhabar kareñ kyūñkar

zindagī ham basar kareñ kyūñkar

tū jafā par bhī to nahīñ qaa.em

ham vafā umr bhar kareñ kyūñkar

chal ga.e haiñ raqīb ke fiqre

merī bāteñ asar kareñ kyūñkar

paañv rakhtā hai ġhair bhī is par

sajda-e-sang-e-dar kareñ kyūñkar

chashm-e-sāqī ke ham haiñ matvāle

jām-e-mai par nazar kareñ kyūñkar

hai nazākat kā us kī ham ko ḳhayāl

nāla-e-bā-asar kareñ kyūñkar

nāla-e-shab kā kyā natīja huā

ham duā-e-sahar kareñ kyūñkar

shauq-e-pinhāñ ne ham ko maarā hai

ye ḳhabar mushtahar kareñ kyūñkar

ḳhauf hai vo na aag ho jaa.e

nāla-e-pur-sharar kareñ kyūñkar

sajda-e-naqsh-e-pā ravā lekin

us ko pāmāl sar kareñ kyūñkar

ham nahīñ bolte haiñ nāseh se

baat ko be-asar kareñ kyūñkar

kahīñ sharmā ke vo na phir jaa.eñ

ham nazar sū-e-dar kareñ kyūñkar

merā likkhā agar vo paḌh na sakā

shikva-e-nāma-bar kareñ kyūñkar

tere shikve bajā sahī 'bedil'

lekin us ko ḳhabar kareñ kyūñkar

us ko ab ye KHabar karen kyunkar

zindagi hum basar karen kyunkar

tu jafa par bhi to nahin qaem

hum wafa umr bhar karen kyunkar

chal gae hain raqib ke fiqre

meri baaten asar karen kyunkar

panw rakhta hai ghair bhi is par

sajda-e-sang-e-dar karen kyunkar

chashm-e-saqi ke hum hain matwale

jam-e-mai par nazar karen kyunkar

hai nazakat ka us ki hum ko KHayal

nala-e-ba-asar karen kyunkar

nala-e-shab ka kya natija hua

hum dua-e-sahar karen kyunkar

shauq-e-pinhan ne hum ko mara hai

ye KHabar mushtahar karen kyunkar

KHauf hai wo na aag ho jae

nala-e-pur-sharar karen kyunkar

sajda-e-naqsh-e-pa rawa lekin

us ko pamal sar karen kyunkar

hum nahin bolte hain naseh se

baat ko be-asar karen kyunkar

kahin sharma ke wo na phir jaen

hum nazar su-e-dar karen kyunkar

mera likkha agar wo paDh na saka

shikwa-e-nama-bar karen kyunkar

tere shikwe baja sahi 'bedil'

lekin us ko KHabar karen kyunkar