usko KHalwat ka meri pas nahin

us ko ḳhalvat kā merī paas nahīñ

kaise kah duuñ ki jī udaas nahīñ

nā-shanāsā koī agar ho bhī

mere nāloñ se nā-shanās nahīñ

kyā huā ġham ke pāsdāroñ ko

kis liye mahv-e-huzn-o-yās nahīñ

chāhtā huuñ jise qarīb apne

ik vahī shaḳhs mere paas nahīñ

barsar-e-bazm hai vo jalva-numā

haif us ko hayā kā paas nahīñ

ḳhuun ko ḳhuun jo nahīñ kahte

aise logoñ se koī aas nahīñ

gāliyāñ bhī nahīñ qubūl unheñ

aur 'izzat bhī un ko raas nahīñ

sāqiyā jaam usī ko detā hai

qatra bhar kī bhī jis ko pyaas nahīñ

kaun ham sā malūl hai jag meñ

juz malāl apnī kuchh asaas nahīñ

baa'd 'sā.in' ke itnā yaad rahe

koī 'āshiq kā ġham-shanās nahīñ

us ko KHalwat ka meri pas nahin

kaise kah dun ki ji udas nahin

na-shanasa koi agar ho bhi

mere nalon se na-shanas nahin

kya hua gham ke pasdaron ko

kis liye mahw-e-huzn-o-yas nahin

chahta hun jise qarib apne

ek wahi shaKHs mere pas nahin

barsar-e-bazm hai wo jalwa-numa

haif us ko haya ka pas nahin

KHun ko KHun jo nahin kahte

aise logon se koi aas nahin

galiyan bhi nahin qubul unhen

aur 'izzat bhi un ko ras nahin

saqiya jam usi ko deta hai

qatra bhar ki bhi jis ko pyas nahin

kaun hum sa malul hai jag mein

juz malal apni kuchh asas nahin

ba'd 'sain' ke itna yaad rahe

koi 'ashiq ka gham-shanas nahin