usko na KHayal aae to hum munh se kahen kya

us ko na ḳhayāl aa.e to ham muñh se kaheñ kyā

vo bhī to mile ham se hamīñ us se mileñ kyā

lashkar ko bachāeñgī ye do-chār safeñ kyā

aur un meñ bhī har shaḳhs ye kahtā hai hameñ kyā

ye to sabhī kahte haiñ koī fikr na karnā

ye koī batātā nahīñ ham ko ki kareñ kyā

ghar se to chale aate haiñ bāzār kī jānib

bāzār meñ ye sochte phirte haiñ ki leñ kyā

āñkhoñ ko kiye band paḌe rahte haiñ ham log

is par bhī to ḳhvāboñ se haiñ mahrūm kareñ kyā

do chaar nahīñ saiñkaḌoñ sher us pe kahe haiñ

is par bhī vo samjhe na to qadmoñ pe jhukeñ kyā

jismānī ta.alluq pe ye sharmindagī kaisī

aapas meñ badan kuchh bhī kareñ is se hameñ kyā

ḳhvāboñ se bhī milte nahīñ hālāt ke Dar se

māthe se baḌī ho ga.iiñ yaaro shikaneñ kyā

us ko na KHayal aae to hum munh se kahen kya

wo bhi to mile hum se hamin us se milen kya

lashkar ko bachaengi ye do-chaar safen kya

aur un mein bhi har shaKHs ye kahta hai hamein kya

ye to sabhi kahte hain koi fikr na karna

ye koi batata nahin hum ko ki karen kya

ghar se to chale aate hain bazar ki jaanib

bazar mein ye sochte phirte hain ki len kya

aankhon ko kiye band paDe rahte hain hum log

is par bhi to KHwabon se hain mahrum karen kya

do chaar nahin sainkaDon sher us pe kahe hain

is par bhi wo samjhe na to qadmon pe jhuken kya

jismani talluq pe ye sharmindagi kaisi

aapas mein badan kuchh bhi karen is se hamein kya

KHwabon se bhi milte nahin haalat ke Dar se

mathe se baDi ho gain yaro shikanen kya