اس نے دیکھا ادھر تو غزل ہو گئی

اس نے دیکھا ادھر تو غزل ہو گئی

مل گئی جب نظر تو غزل ہو گئی

بوندیں برسات کی مثل شبنم گریں

ان کے رخسار پر تو غزل ہو گئی

فاصلہ ان لبوں سے لبوں کا مرے

جب ہوا مختصر تو غزل ہو گئی

اس کی تصویر سے بات کرتے ہوئے

شب گئی جب گزر تو غزل ہو گئی

ایک پل کے لئے میں غم دہر سے

جب ہوا بے خبر تو غزل ہو گئی

کر کے تنہائیوں کے حوالے مجھے

چھپ گیا جب قمر تو غزل ہو گئی

اس کے آنے کی جب وہ خبر اے فرازؔ

ہو گئی معتبر تو غزل ہو گئی