usne jo gham kiye hawale the

us ne jo ġham kiye havāle the

ham ne ik umr vo sambhāle the

sehn-e-dil meñ tumhāre sab va.ade

maiñ ne bachchoñ kī tarah paale the

aañkh se ḳhud-ba-ḳhud nikal aa.e

ashk ham ne kahāñ nikāle the

ik ḳhushī aise muskurā.ī thī

dard jaise bichhaḌne vaale the

apne hāthoñ se jo banā.e but

ek din saare toḌ Daale the

chār-sū vahshatoñ kā Derā thā

jaan ke har kisī ko laale the

ajnabī ban ke jo mile the 'amīn'

log sab mere dekhe-bhāle the

us ne jo gham kiye hawale the

hum ne ek umr wo sambhaale the

sehn-e-dil mein tumhaare sab wade

main ne bachchon ki tarah pale the

aankh se KHud-ba-KHud nikal aae

ashk hum ne kahan nikale the

ek KHushi aise muskurai thi

dard jaise bichhaDne wale the

apne hathon se jo banae but

ek din sare toD Dale the

chaar-su wahshaton ka Dera tha

jaan ke har kisi ko lale the

ajnabi ban ke jo mile the 'amin'

log sab mere dekhe-bhaale the