usne kiya hai wada-e-farda aane do usko aae to

us ne kiyā hai vāda-e-fardā aane do us ko aa.e to

naam badal denā phir merā lauT ke vāpas jaa.e to

arz-e-tamannā kareñge us se agar na vo Thukrā.e to

us se zarūr mileñge jā kar pahle hameñ bulā.e to

izzat-e-nafs kā hai ye taqāzā husn-e-sulūk kareñ donoñ

us ko ham labbaik kaheñge rasm-e-vafā nibhā.e to

saf.ha-e-zehn pe naqsh hai us kā mere abhī tak nāz-o-niyāz

jaise sharmātā thā pahle vaise hī sharmā.e to

rūThne aur manāne ke ehsās meñ hai ik kaif-o-surūr

maiñ ne hamesha use manāyā vo bhī mujhe manā.e to

kyuuñ rahtā hai mujh se bad-zan hai jo mirā manzūr-e-nazar

kuchh nahīñ aatā merī samajh meñ koī mujhe samjhā.e to

ḳhūn-e-jigar se sīñchūñgā gulzār-e-tamannā us ke liye

bāġh-e-hayāt meñ gul-e-mohabbat aa kar mire khilā.e to

fasl-e-ḳhizāñ meñ kyā hogā āsār numāyāñ haiñ jis ke

fasl-e-bahār meñ 'barqī' apne dil kī kalī murjhā.e to

us ne kiya hai wada-e-farda aane do us ko aae to

nam badal dena phir mera lauT ke wapas jae to

arz-e-tamanna karenge us se agar na wo Thukrae to

us se zarur milenge ja kar pahle hamein bulae to

izzat-e-nafs ka hai ye taqaza husn-e-suluk karen donon

us ko hum labbaik kahenge rasm-e-wafa nibhae to

safha-e-zehn pe naqsh hai us ka mere abhi tak naz-o-niyaz

jaise sharmata tha pahle waise hi sharmae to

ruThne aur manane ke ehsas mein hai ek kaif-o-surur

main ne hamesha use manaya wo bhi mujhe manae to

kyun rahta hai mujh se bad-zan hai jo mera manzur-e-nazar

kuchh nahin aata meri samajh mein koi mujhe samjhae to

KHun-e-jigar se sinchunga gulzar-e-tamanna us ke liye

bagh-e-hayat mein gul-e-mohabbat aa kar mere khilae to

fasl-e-KHizan mein kya hoga aasar numayan hain jis ke

fasl-e-bahaar mein 'barqi' apne dil ki kali murjhae to