us se kya KHak ham-nashin banti

us se kyā ḳhaak ham-nashīñ bantī

baat bigḌī huī nahīñ bantī

vo banī ibtidā-e-ulfat meñ

dam pe jo vaqt-e-vāpsīñ bantī

aadmī sab farishte ban jaate

āsmāñ par agar zamīñ bantī

merī sūrat banī to ḳhaak banī

qismat ai sūrat-āfrīñ bantī

vaade karte hī kyā vo aa jaate

raat bhar zulf-e-ambarīñ bantī

kaash suntā na koī shor o fuġhāñ

dil kī jā chashm-e-surmagīñ bantī

tū ne aise bigāḌ Daale haiñ

ek kī ek se nahīñ bantī

na chamaktī jo husn kī taqdīr

kyuuñ tirī chāñd sī jabīñ bantī

pāra-e-jeb se mire ai kaash

dast-e-vahshat kī āstīñ bantī

bazm-e-duniyā thī qābil-e-jannat

ḳhuub bantī agar yahīñ bantī

tab-e-nāzuk kā lutf jab thā 'dāġh'

nāznīnoñ meñ nāznīñ bantī

us se kya KHak ham-nashin banti

baat bigDi hui nahin banti

wo bani ibtida-e-ulfat mein

dam pe jo waqt-e-wapsin banti

aadmi sab farishte ban jate

aasman par agar zamin banti

meri surat bani to KHak bani

qismat ai surat-afrin banti

wade karte hi kya wo aa jate

raat bhar zulf-e-ambarin banti

kash sunta na koi shor o fughan

dil ki ja chashm-e-surmagin banti

tu ne aise bigaD Dale hain

ek ki ek se nahin banti

na chamakti jo husn ki taqdir

kyun teri chand si jabin banti

para-e-jeb se mere ai kash

dast-e-wahshat ki aastin banti

bazm-e-duniya thi qabil-e-jannat

KHub banti agar yahin banti

tab-e-nazuk ka lutf jab tha 'dagh'

nazninon mein naznin banti