us zulf ke saude ka KHalal jae to achchha

us zulf ke saude kā ḳhalal jaa.e to achchhā

us pech se dil apnā nikal jaa.e to achchhā

shatranj meñ jī un kā bahal jaa.e to achchhā

ai 'mehr' ye chaal achchhī hai chal jaa.e to achchhā

is ziist se ab maut badal jaa.e to achchhā

bechain hai dil jaan nikal jaa.e to achchhā

mahrūm huuñ is daur meñ saaqī faqat ik maiñ

ai kaash ḳhum-e-bāda ubal jaa.e to achchhā

ḳham Thoñk ke kartā hai ye ab beach bulā ke

is tarah ke tarrār kā bal jaa.e to achchhā

is ishq meñ phir jaan ke paḌ jā.eñge laale

ab bhī dil-e-betāb sambhal jaa.e to achchhā

chhū jaa.e jo bande kī sivā jism se tere

allāh kare haath vo gul jaa.e to achchhā

kyā ishq sā hai ishq mohabbat sī mohabbat

badlūñgā maiñ is dil ko badal jaa.e to achchhā

mumkin hī nahīñ hai ki bache jaan salāmat

us kūche meñ mushtāq-e-ajal jaa.e to achchhā

bosoñ meñ mazā qand-e-mukarrar kā ho saaqī

ik daur dobāra kā bhī Dhal jaa.e to achchhā

ab zauq kī mānind ġham-e-ishq jigar meñ

kāñTā sā khaTaktā hai nikal jaa.e to achchhā

rañgīnī-e-fikr aur merī raushnī-e-tama.a

kuchh la.al-o-gohar aur ugal jaa.e to achchhā

ahbāb-e-banaras ke liye 'mehr' kā tohfa

ek aur bhī saath us ke ġhazal jaa.e to achchhā

us zulf ke saude ka KHalal jae to achchha

us pech se dil apna nikal jae to achchha

shatranj mein ji un ka bahal jae to achchha

ai 'mehr' ye chaal achchhi hai chal jae to achchha

is zist se ab maut badal jae to achchha

bechain hai dil jaan nikal jae to achchha

mahrum hun is daur mein saqi faqat ek main

ai kash KHum-e-baada ubal jae to achchha

KHam Thonk ke karta hai ye ab beach bula ke

is tarah ke tarrar ka bal jae to achchha

is ishq mein phir jaan ke paD jaenge lale

ab bhi dil-e-betab sambhal jae to achchha

chhu jae jo bande ki siwa jism se tere

allah kare hath wo gul jae to achchha

kya ishq sa hai ishq mohabbat si mohabbat

badlunga main is dil ko badal jae to achchha

mumkin hi nahin hai ki bache jaan salamat

us kuche mein mushtaq-e-ajal jae to achchha

boson mein maza qand-e-mukarrar ka ho saqi

ek daur dobara ka bhi Dhal jae to achchha

ab zauq ki manind gham-e-ishq jigar mein

kanTa sa khaTakta hai nikal jae to achchha

rangini-e-fikr aur meri raushni-e-tama

kuchh lal-o-gohar aur ugal jae to achchha

ahbab-e-banaras ke liye 'mehr' ka tohfa

ek aur bhi sath us ke ghazal jae to achchha