use hum bhi bhul baiThe na kar us ka zikr tu bhi

use ham bhī bhuul baiThe na kar us kā zikr tū bhī

koī chaak agar ho zāhir to kareñ use rafū bhī

chalo chal ke pūchh aa.eñ ki ḳhizāñ kī is galī meñ

kabhī aa chukā ho shāyad koī sail-e-rañg-o-bū bhī

uḌī tishnagī ke kūche meñ vo gard ik taraf se

ham uThā sake na tāqoñ se gire hue subū bhī

abhī kaise bhuul jā.ūñ maiñ ye vāqi.a safar meñ

abhī gard-e-raftagāñ bhī hai jagah jagah lahū bhī

is iram iram zamīñ par ki bahār umañD rahī hai

koī phuul agar khilā de mirī be-numū bhī

tirī anjuman kī raunaq meñ na farq aa.egā kuchh

hameñ chup biThāne vaale kabhī ham se guftugū bhī

mere ḳhāl-o-ḳhad ko sūrat kā faroġh dene vaalo

kisī naqsh meñ dikhāo mirā zaḳhm-e-sholā-rū bhī

use hum bhi bhul baiThe na kar us ka zikr tu bhi

koi chaak agar ho zahir to karen use rafu bhi

chalo chal ke puchh aaen ki KHizan ki is gali mein

kabhi aa chuka ho shayad koi sail-e-rang-o-bu bhi

uDi tishnagi ke kuche mein wo gard ek taraf se

hum uTha sake na taqon se gire hue subu bhi

abhi kaise bhul jaun main ye waqia safar mein

abhi gard-e-raftagan bhi hai jagah jagah lahu bhi

is iram iram zamin par ki bahaar umanD rahi hai

koi phul agar khila de meri be-numu bhi

teri anjuman ki raunaq mein na farq aaega kuchh

hamein chup biThane wale kabhi hum se guftugu bhi

mere KHal-o-KHad ko surat ka farogh dene walo

kisi naqsh mein dikhao mera zaKHm-e-shola-ru bhi