use to pas-e-KHulus-e-wafa zara bhi nahin

use to pās-e-ḳhulūs-e-vafā zarā bhī nahīñ

magar ye aas kā rishta ki TūTtā bhī nahīñ

ghire hue haiñ ḳhamoshī kī barf meñ kab se

kisī ke paas koī tesha-e-sadā bhī nahīñ

ma.āl-e-ġhunch-o-gul hai mirī nigāhoñ meñ

mujhe tabassum-e-kāzib kā hausla bhī nahīñ

tulū-e-sub.h-e-azal se maiñ DhūñDhtā thā jise

milā to hai pa mirī samt dekhtā bhī nahīñ

mirī sadā se bhī raftār tez thī us kī

mujhe gila bhī nahīñ hai jo vo rukā bhī nahīñ

bikhar ga.ī hai nigāhoñ kī raushnī varna

nazar na aa.e vo itnā to fāsla bhī nahīñ

sunā hai aaj kā mauzū-e-majlis-e-tanqīd

vo sher hai ki abhī maiñ ne jo kahā bhī nahīñ

simaT rahe haiñ sitāroñ ke fāsle 'anvar'

paḌosiyoñ ko magar koī jāntā bhī nahīñ

use to pas-e-KHulus-e-wafa zara bhi nahin

magar ye aas ka rishta ki TuTta bhi nahin

ghire hue hain KHamoshi ki barf mein kab se

kisi ke pas koi tesha-e-sada bhi nahin

maal-e-ghunch-o-gul hai meri nigahon mein

mujhe tabassum-e-kazib ka hausla bhi nahin

tulu-e-subh-e-azal se main DhunDhta tha jise

mila to hai pa meri samt dekhta bhi nahin

meri sada se bhi raftar tez thi us ki

mujhe gila bhi nahin hai jo wo ruka bhi nahin

bikhar gai hai nigahon ki raushni warna

nazar na aae wo itna to fasla bhi nahin

suna hai aaj ka mauzu-e-majlis-e-tanqid

wo sher hai ki abhi main ne jo kaha bhi nahin

simaT rahe hain sitaron ke fasle 'anwar'

paDosiyon ko magar koi jaanta bhi nahin