usi ek fard ke waste mere dil mein dard hai kis liye

usī ek fard ke vāste mire dil meñ dard hai kis liye

mirī zindagī kā mutāliba vahī ek fard hai kis liye

tū jo shahr meñ hī muqīm hai to musāfirat kī fazā hai kyuuñ

tirā kārvāñ jo nahīñ gayā to havā meñ gard hai kis liye

na jamāl-o-husn kī bazm hai na junūn o ishq kā azm hai

sar-e-dasht raqs meñ har ghaḌī koī bādgard hai kis liye

tire husn se ye patā chalā tujhe dekh kar ye ḳhabar huī

jahāñ rāsta hī nahīñ koī vahāñ rah-navard hai kis liye

jo likhā hai mere nasīb meñ kahīñ tū ne paḌh to nahīñ liyā

tirā haath sard hai kis liye tirā rañg zard hai kis liye

vo jo tark-e-rabt kā ahd thā kahīñ TūTne to nahīñ lagā

tire dil ke dard ko dekh kar mire dil meñ dard hai kis liye

koī vāsta jo nahīñ rahā tirī aañkh meñ ye namī hai kyuuñ

mire ġham kī aag ko dekh kar tirī aah sard hai kis liye

usi ek fard ke waste mere dil mein dard hai kis liye

meri zindagi ka mutaliba wahi ek fard hai kis liye

tu jo shahr mein hi muqim hai to musafirat ki faza hai kyun

tera karwan jo nahin gaya to hawa mein gard hai kis liye

na jamal-o-husn ki bazm hai na junun o ishq ka azm hai

sar-e-dasht raqs mein har ghaDi koi baadgard hai kis liye

tere husn se ye pata chala tujhe dekh kar ye KHabar hui

jahan rasta hi nahin koi wahan rah-naward hai kis liye

jo likha hai mere nasib mein kahin tu ne paDh to nahin liya

tera hath sard hai kis liye tera rang zard hai kis liye

wo jo tark-e-rabt ka ahd tha kahin TuTne to nahin laga

tere dil ke dard ko dekh kar mere dil mein dard hai kis liye

koi wasta jo nahin raha teri aankh mein ye nami hai kyun

mere gham ki aag ko dekh kar teri aah sard hai kis liye