usi ki dastanen hain usi ki qissa-KHwani hai

usī kī dāstāneñ haiñ usī kī qissa-ḳhvānī hai

vo lutf-e-ḳhās jo mujh par tirā ai yār-e-jānī hai

na jā zālim abhī to tishna-e-dīdār haiñ āñkheñ

zarā dam le abhī to dāstān-e-ġham sunānī hai

mohabbat zulf kā aaseb jaadū hai nigāhoñ kā

mohabbat fitna-e-mahshar balā-e-nā-gahānī hai

bujhī hasrat kā nauha hai dil-e-marhūm kā mātam

ba-alfāz-e-digar ye sher-ḳhvānī soz-ḳhvānī hai

gharānā hai hamārā 'dāġh' kā ham dillī vaale haiñ

zamāne meñ musallam 'ḳhār' apnī ḳhush-bayānī hai

usi ki dastanen hain usi ki qissa-KHwani hai

wo lutf-e-KHas jo mujh par tera ai yar-e-jaani hai

na ja zalim abhi to tishna-e-didar hain aankhen

zara dam le abhi to dastan-e-gham sunani hai

mohabbat zulf ka aaseb jadu hai nigahon ka

mohabbat fitna-e-mahshar bala-e-na-gahani hai

bujhi hasrat ka nauha hai dil-e-marhum ka matam

ba-alfaz-e-digar ye sher-KHwani soz-KHwani hai

gharana hai hamara 'dagh' ka hum dilli wale hain

zamane mein musallam 'KHar' apni KHush-bayani hai