usi kinara-e-hairat-sara ko jata hun

usī kināra-e-hairat-sarā ko jaatā huuñ

maiñ ik savār huuñ koh-e-nidā ko jaatā huuñ

ramīdgī kā bayābāñ hai aur be-ḳhor-o-ḳhvāb

ġhubār kartā sukūt o sadā ko jaatā huuñ

qarīb hī kisī ḳheme se aag pūchhtī hai

ki is shikoh se kis qartaba ko jaatā huuñ

hazar ki dajla-e-dushvār par qadam rakhtā

shikār-gāh-e-furāt-o-fanā ko jaatā huuñ

kahāñ ga.e vo ḳhudāyān-e-dirham-o-dīnār

ki ik dafīna-e-dasht-e-balā ko jaatā huuñ

safārat-e-had-e-hairāngī pe huuñ māmūr

nigār-ḳhāna-e-husn-o-adā ko jaatā huuñ

vo din bhī aa.e ki inkār kar sakūñ 'sarvat'

abhī to ma.abad-e-hamd-o-sanā ko jaatā huuñ

usi kinara-e-hairat-sara ko jata hun

main ek sawar hun koh-e-nida ko jata hun

ramidgi ka bayaban hai aur be-KHor-o-KHwab

ghubar karta sukut o sada ko jata hun

qarib hi kisi KHeme se aag puchhti hai

ki is shikoh se kis qartaba ko jata hun

hazar ki dajla-e-dushwar par qadam rakhta

shikar-gah-e-furaat-o-fana ko jata hun

kahan gae wo KHudayan-e-dirham-o-dinar

ki ek dafina-e-dasht-e-bala ko jata hun

safarat-e-had-e-hairangi pe hun mamur

nigar-KHana-e-husn-o-ada ko jata hun

wo din bhi aae ki inkar kar sakun 'sarwat'

abhi to mabad-e-hamd-o-sana ko jata hun