utar kar paniyon mein chand mahw-e-raqs rahta hai

utar kar pāniyoñ meñ chāñd mahv-e-raqs rahtā hai

mirī āñkhoñ meñ kuchh is taur koī shaḳhs rahtā hai

'ajab hairat hai aksar dekhtā hai mere chehre ko

ye kis nā-āshnā kā aa.ine meñ 'aks rahtā hai

mirī bastī kā koī ghar bhī ghar jaisā nahīñ lagtā

kahīñ ta.amīr-e-bām-o-dar meñ koī naqs rahtā hai

jamī hai gard āñkhoñ meñ ka.ī gumnām barsoñ kī

mire andar na jaane kaun būḌhā shaḳhs rahtā hai

chalo bād-e-sabā ko jañgaloñ se DhūñDh kar laa.eñ

fasīl-e-shahr meñ 'az.har' balā kā habs rahtā hai

utar kar paniyon mein chand mahw-e-raqs rahta hai

meri aankhon mein kuchh is taur koi shaKHs rahta hai

'ajab hairat hai aksar dekhta hai mere chehre ko

ye kis na-ashna ka aaine mein 'aks rahta hai

meri basti ka koi ghar bhi ghar jaisa nahin lagta

kahin tamir-e-baam-o-dar mein koi naqs rahta hai

jami hai gard aankhon mein kai gumnam barson ki

mere andar na jaane kaun buDha shaKHs rahta hai

chalo baad-e-saba ko jangalon se DhunDh kar laen

fasil-e-shahr mein 'azhar' bala ka habs rahta hai