uTha bhi dil se agar meri chashm-e-tar mein raha

uThā bhī dil se agar merī chashm-e-tar meñ rahā

ḳhudā kā shukr hai tūfān ghar kā ghar meñ rahā

na jaane kaun sī us meñ kashish thī poshīda

tamām umr vo chehra mirī nazar meñ rahā

sitam shi.ār se ham jiite jī ye kyoñ kah deñ

ki hausla na hamāre dil-o-jigar meñ rahā

na rok pā.ūñgā hargiz maiñ terī rusvā.ī

tū ashk ban ke agar merī chashm-e-tar meñ rahā

vo merī tarah bhī ḳhāna-ḳharāb kyoñ rahtā

banā ke dil ko mire ghar vo apne ghar meñ rahā

fanā ke baad bhī kī hai tirī qadam-bosī

maiñ ḳhaak ho ke bhī terī hī rahguzar meñ rahā

gayā jo taaj milī bā-kamāl darveshī

zamāna yuuñ bhī mire halqa-e-asar meñ rahā

zarūr ho na ho tū thā mujhī meñ poshīda

ye zauq-e-sajda hamesha jo sar ke sar meñ rahā

gayā jo manzil-e-maqsūd tak to dīvāna

ye ahl-e-hosh hamesha agar-magar meñ rahā

hai 'ehtishām' zamāne meñ baḌh ke ek se ek

vo kaun hai ki jo yaktā kisī hunar meñ rahā

uTha bhi dil se agar meri chashm-e-tar mein raha

KHuda ka shukr hai tufan ghar ka ghar mein raha

na jaane kaun si us mein kashish thi poshida

tamam umr wo chehra meri nazar mein raha

sitam shiar se hum jite ji ye kyon kah den

ki hausla na hamare dil-o-jigar mein raha

na rok paunga hargiz main teri ruswai

tu ashk ban ke agar meri chashm-e-tar mein raha

wo meri tarah bhi KHana-KHarab kyon rahta

bana ke dil ko mere ghar wo apne ghar mein raha

fana ke baad bhi ki hai teri qadam-bosi

main KHak ho ke bhi teri hi rahguzar mein raha

gaya jo taj mili ba-kamal darweshi

zamana yun bhi mere halqa-e-asar mein raha

zarur ho na ho tu tha mujhi mein poshida

ye zauq-e-sajda hamesha jo sar ke sar mein raha

gaya jo manzil-e-maqsud tak to diwana

ye ahl-e-hosh hamesha agar-magar mein raha

hai 'ehtisham' zamane mein baDh ke ek se ek

wo kaun hai ki jo yakta kisi hunar mein raha