uTha ke kasa-e-kaun-o-makan sawal kiya

uThā ke kāsa-e-kaun-o-makāñ savāl kiyā

is ek baat pe tū ne sab ishti'āl kiyā

qarīb thā ki koī ā.inoñ meñ ghir jaatā

kahīñ se ret uḌī aur 'ajab kamāl kiyā

bahār aa ke rahī ġhuncha-e-tamanna meñ

phir ek aañkh ne rang-e-hunar misāl kiyā

kahīñ pe koī du'ā tāqchoñ meñ Duub ga.ī

to shām-e-shahr-e-safar ne bahut malāl kiyā

koī nigāh thī māne' vagarna kār-e-jahāñ

gahe gahe na huā aur ḳhāl-ḳhāl kiyā

ye kaisā phuul utartā hai sat.h-e-dariyā par

ye kis talab ne nigāhoñ kā rang laal kiyā

koī tamanna bhaTaktī thī dil kī galiyoñ meñ

phir ek roz use bhī udhar nikāl kiyā

uTha ke kasa-e-kaun-o-makan sawal kiya

is ek baat pe tu ne sab ishti'al kiya

qarib tha ki koi aainon mein ghir jata

kahin se ret uDi aur 'ajab kamal kiya

bahaar aa ke rahi ghuncha-e-tamanna mein

phir ek aankh ne rang-e-hunar misal kiya

kahin pe koi du'a taqchon mein Dub gai

to sham-e-shahr-e-safar ne bahut malal kiya

koi nigah thi mane' wagarna kar-e-jahan

gahe gahe na hua aur KHal-KHal kiya

ye kaisa phul utarta hai sath-e-dariya par

ye kis talab ne nigahon ka rang lal kiya

koi tamanna bhaTakti thi dil ki galiyon mein

phir ek roz use bhi udhar nikal kiya