uTha surahi ye shisha wo jam le saqi

uThā surāhī ye shīsha vo jaam le saaqī

phir is ke ba.ad ḳhudā kā bhī naam le saaqī

phir is ke ba.ad hameñ tishnagī rahe na rahe

kuchh aur der muravvat se kaam le saaqī

tire huzūr meñ hosh-o-ḳhirad se kyā hāsil

kabhī to hosh-o-ḳhirad se bhī kaam le saaqī

phir is ke ba.ad jo hogā vo dekhā jā.egā

abhī to pīne-pilāne se kaam le saaqī

hameñ hai kaif-o-nashāt-o-surūr se matlab

nahīñ hai mai to nigāhoñ se kaam le saaqī

ye aur kuchh bhī hoñ kāfir nahīñ haiñ tere riñd

tū bād-e-jām ḳhudā kā bhī naam le saaqī

kaho ye ḳhizr se bhaTke na yuuñ zamāne meñ

yahāñ se āb-e-baqā-e-davām le saaqī

sahar kā kaam nahīñ mai-kade kī duniyā meñ

sahar kā naam na le lutf-e-shām le saaqī

kabhī thā zīnat-e-mahfil vo riñd-e-dariyā-nosh

ba-vaqt-e-daur 'sahar' kā bhī naam le saaqī

uTha surahi ye shisha wo jam le saqi

phir is ke baad KHuda ka bhi nam le saqi

phir is ke baad hamein tishnagi rahe na rahe

kuchh aur der murawwat se kaam le saqi

tere huzur mein hosh-o-KHirad se kya hasil

kabhi to hosh-o-KHirad se bhi kaam le saqi

phir is ke baad jo hoga wo dekha jaega

abhi to pine-pilane se kaam le saqi

hamein hai kaif-o-nashat-o-surur se matlab

nahin hai mai to nigahon se kaam le saqi

ye aur kuchh bhi hon kafir nahin hain tere rind

tu baad-e-jam KHuda ka bhi nam le saqi

kaho ye KHizr se bhaTke na yun zamane mein

yahan se aab-e-baqa-e-dawam le saqi

sahar ka kaam nahin mai-kade ki duniya mein

sahar ka nam na le lutf-e-sham le saqi

kabhi tha zinat-e-mahfil wo rind-e-dariya-nosh

ba-waqt-e-daur 'sahar' ka bhi nam le saqi