husn us shoKH ka aha-haha

husn us shoḳh kā ahā-hāhā

jin ne dekhā kahā ahā-hāhā

zulf Daale hai gardan-e-dil meñ

daam kyā kyā baḌhā ahā-hāhā

teġh-e-abrū bhī kartī hai dil par

vaar kyā kyā nayā ahā-hāhā

aan par aan vo ajī o ho

aur adā par adā ahā-hāhā

naaz se jo na ho vo kartī hai

chupke chupke hayā ahā-hāhā

tā.ir-e-dil pe us kā bāz-e-nigāh

jis ghaḌī aa paḌā ahā-hāhā

us kī phurtī aur us kī lap-chhap kā

kyā tamāshā huā ahā-hāhā

bazm-e-ḳhūbāñ meñ jab gayā vo shoḳh

apnī saj-dhaj banā ahā-hāhā

kī o ho-ho kisī ne dekh 'nazīr'

koī kahne lagā ahā-hāhā

husn us shoKH ka aha-haha

jin ne dekha kaha aha-haha

zulf Dale hai gardan-e-dil mein

dam kya kya baDha aha-haha

tegh-e-abru bhi karti hai dil par

war kya kya naya aha-haha

aan par aan wo aji o ho

aur ada par ada aha-haha

naz se jo na ho wo karti hai

chupke chupke haya aha-haha

tair-e-dil pe us ka baz-e-nigah

jis ghaDi aa paDa aha-haha

us ki phurti aur us ki lap-chhap ka

kya tamasha hua aha-haha

bazm-e-KHuban mein jab gaya wo shoKH

apni saj-dhaj bana aha-haha

ki o ho-ho kisi ne dekh 'nazir'

koi kahne laga aha-haha