wada sachcha hai ki jhuTa mujhe malum na tha

va.ada sachchā hai ki jhūTā mujhe ma.alūm na thā

kal badal jā.egī duniyā mujhe ma.alūm na thā

husn hai mashġhala-e-zulm ko gahrā parda

pas-e-parda hai añdherā mujhe ma.alūm na thā

ishq vo shai hai ki charke bhī maza dete haiñ

varna qātil haiñ hasīñ kyā mujhe ma.alūm na thā

dil kī zid is liye rakh lī thī ki aa jaa.e qarār

kal ye kuchh aur kahegā mujhe ma.alūm na thā

jhūTī ummīdoñ ne kyā kyā na hare baaġh lagā.e

vaqt jhoñkā hai havā kā mujhe ma.alūm na thā

jitne qismat ke sahāre the vo jhūTe nikle

hai bañdhī muTThiyoñ meñ kyā mujhe ma.alūm na thā

barsoñ bhaTkā kiyā aur phir bhī na un tak pahuñchā

ghar to ma.alūm thā rasta mujhe ma.alūm na thā

rāz-e-ġham faash na ho is liye rokī thī zabāñ

chup bhī rah kar yahī hogā mujhe ma.alūm na thā

dil maze letā hai jis ġham ke vo hai kāhish-e-jāñ

zahr bhī hotā hai mīThā mujhe ma.alūm na thā

ishq-ābād ke naake hī se ruḳhsat hue hosh

hai ye dīvānoñ kī duniyā mujhe ma.alūm na thā

hogā imroz kī sūrat meñ zuhūr-e-fardā

va.ada yuuñ roz Talegā mujhe ma.alūm na thā

aarzū haañ bhī hasīnoñ kī nahīñ hotī hai

in kī har baat hai dhokā mujhe ma.alūm na thā

wada sachcha hai ki jhuTa mujhe malum na tha

kal badal jaegi duniya mujhe malum na tha

husn hai mashghala-e-zulm ko gahra parda

pas-e-parda hai andhera mujhe malum na tha

ishq wo shai hai ki charke bhi maza dete hain

warna qatil hain hasin kya mujhe malum na tha

dil ki zid is liye rakh li thi ki aa jae qarar

kal ye kuchh aur kahega mujhe malum na tha

jhuTi ummidon ne kya kya na hare bagh lagae

waqt jhonka hai hawa ka mujhe malum na tha

jitne qismat ke sahaare the wo jhuTe nikle

hai bandhi muTThiyon mein kya mujhe malum na tha

barson bhaTka kiya aur phir bhi na un tak pahuncha

ghar to malum tha rasta mujhe malum na tha

raaz-e-gham fash na ho is liye roki thi zaban

chup bhi rah kar yahi hoga mujhe malum na tha

dil maze leta hai jis gham ke wo hai kahish-e-jaan

zahr bhi hota hai miTha mujhe malum na tha

ishq-abaad ke nake hi se ruKHsat hue hosh

hai ye diwanon ki duniya mujhe malum na tha

hoga imroz ki surat mein zuhur-e-farda

wada yun roz Talega mujhe malum na tha

aarzu han bhi hasinon ki nahin hoti hai

in ki har baat hai dhoka mujhe malum na tha